Gasuapara, Sep 17, 2026:South Garo Hills a·jao donggipa, Dimapara-oni Ruga gita Chokpot-ona re·gipa rama namsrangjani gimin, Tojanang aro Dompai songni manderang Butbar salo ro·ongrangko sale namgijagipa ramarangko a·mang dapaha.

Songni manderangni u·iatani gitade, ru·uta bilsirangonin, ua ramani bidingo joltangni dilgiparangko gronge bang·a lekkarangko see memorandum-rangko on·aha aro PWD department-naba chittirangko seataha. Indiba manderangni mol·molanirangko darangba knachakjaha aro sorkarini maming dakchakanirangko man·jaha. Uni a·sel salantio dingtang dingtang nanga kamrangna re·ruraenggipa jolni manderang, poraienggipa chatro chatrirang namen neng·nikaniko man·tokenga.

Batanggipa adita antirangna skang, Karawengri songni sagipa mandeko, songni manderang jinma chile, Dalu PHC-ona re·angaha. Iandake neng·nikanirangko olgrokatna gita songni manderang, Pandith Marak aro Adrian Sangma, an·tangtangni garirangko jakkale, songni manderang baksa jinma September 16 tariko social work ka·aha ine u·iataha.

Re·anggipa antio a·dokni Skotong Minister Conrad K. Sangma, program ge·sao salantian kilometre 1 atade Meghalaya-o ramarangko tarienga ine parakangaha. Indiba, South Garo Hills a·jaode, changni chang a·dok sorkarina aro joltangni dilgiparangna chitti seate, mol·molaniko dakpaoba, maming dakchakaniko on·jaha ine songni manderang gisiko suk ong·gijaniko parakataha.