Williamnagar, Aug 31, 2026: August 30 tarik Robibar pringwalo, East Garo Hills a·jani Songsak ramao pulisrangni nirok sandianirangko dakengmiting somoio, silchi dare ra·bitgipa manderang baksa  pulusrangni  gogrikanio, sakbri manderang, so·otako man·aha. 

Ua manderang, Songsak aro Dagal ramao Highway Infrastructure Project-ko kam ka·enggipa NHIDCL-ni official-rangko rim·sruke tangka dabina miksonanio re·baengachim. Uamangni re·baengako ning·joljol kobor man·soe, Anti Terror Squad, district Pulis aro Songsak Pulis Station bakrime nirok sandianiko dakenngmiting somoio, ua manderangko check point-o dongdipatahaon, ua manderang rang·san pulisrangko gona a·bachengaha, indake dolgni gogrikanio, silchidare ra·bitgipa sakbri manderang so·otako man·aha, Pulis official u·iataha.

Pulisrangni u·iatani gitade, goa man·e sianggipa manderangara, North Garo Hills a·jani Mendima songoni Allason Marak baksa gipin sakgittamde, Assam Goalpara-oni Sustom Rabha, Kalam Ali aro Bobidul Islam ong·achim. Ua manderang Assam aro Meghalaya sima ari jolrango manderangoniko ra·sekdrae, bading chiwalgiparangoniko tangka dabidrae ra·rongachim aro mande rim·srukan baksana namgijagipa kamrangko ka·rongachim. 

Pulisrangni see rakkiani gitade, 

Alkason Marak batanggipa somoio Dudnhoi-ni badinggipa saksa Abu Syed-ko Damra-o silai goe so·otanio mongsonggipa ong·achim. Sustom Rabha-ni dingtang dingtang namgijagipa kamrangara jekai ra·seke ra·ani, mande rim·srukani aro silchidare jakkalani gimin, Dudnhoi, Mendipathar aro Dadenggre Pulis Station-osan ong·aigija, Assam aro Meghalaya-ni dingtang dingtang pulis station-rango bang·a case-rangko registered ka·aha. Kalam Ali, Krishnai Pulis Station-o mande rim·srukani, tangka dabidrae ra·ani aro Bobidul Islam-ni namgijagipa kamrangara mande dokani aro manderangko kal·ake roani case-rang dongachim.  

Pulisrang uamangni garioniko a·songtango tarigipa pistol ge·gni, ge·sade Beretta baksana gulirang aro jakkalgimin gulirangko man·aha. Ua pistol-rangchin pulisrangni uamangko check ka·na gari dongdipatmiting somoio goaha, ine Pulis officer-rang aganaha. 

Ia a·sel Robibar pringwalni 4 bajimango ong·aha ine Pulis official-rang u·iataha.