Tura, Sep 2, 2026: Meghalaya a·dokni Skotong Minister Conrad K.Sangma Monggolbar salo ‘Tracing the Roots’ program-ko Mongolbar salo, Tura District Auditorium-o a·bachengate on·angaha. Ia program-o, a·dokni Arts & Culture Minister Sanbor Shullai, Gambegre MLA Mehtab Chandee A Sangma aro Arts & Cultural-ni Director dongpae bak ra·angaha.

Ia ‘Tracing the Roots’ ba ‘Ja·pang Ja·dil’ program-ko a·bachengate on·anio Skotong Minister, jinmana aganangengon, ian PA Sangma sagini agane donanggipa ja·kuko de·e a·bachengatani ong·enga ine aganaha. Ian Meghalaya a·doko songdongenggipa Tribal jatrangni daka rikanirangko talbate ma·sina a·bachengatenggipa kam ba program ong·a ine ua aganangaha.

Indake ia Research ka·ani ba Am·sandiani Project ba kamko a·dokni manderangna pakwate on·angengon, ia program-ko PA Sangma sagini chang 79-gipa atchiani salko gisik ra·anio a·bachengate on·aniara, uko mande ra·pilskaani bak ong·enga ine Skotong Minister aganaha.

Ia project-ara, A·chikrang banoni maidake, basakoni ong·baachim, uani gimin, dingtang dingtang ma·ambirangko ba itihasrangko ning·tue am·sandiani project ong·a ine Skotong Minister aganangaha. PA Sangma sagini agane donanggipa kattarangko gisik ra·atpile, uni agangipa kattarangara, una classroom-o skie on·a gita a·dokni manderangna dingtangmancha ramako mesoke on·ani ong·aha ineba Sangma aganaha.

Meghalaya a·doko songdongenggipa manderang, mongsongbate A·chikrangni ‘Tracing the Roots’, ‘Ja·pang Ja·dil’ banoni maidake ma·ambiara ong·baa, daka rikanirangko da·onaba ning·tue am·sandianirang dongkuja, indiba da·alo a·dok sorkari, dingtangmancha A·chik jatni ong·baani, daka rikanirang aro doka dam·anirangko talbate ma·sina ia kamko a·bachengatenga ine Skotong Minister aganaha.

Ia ‘Tracing the Roots’ program-ni ning·o sak 75 manderang Khasi, Jaintia aro Garo jatrangni ong·baaniko sandirikkitna gita Vietnam, Cambodia aro Tibet a·songrangona re·anggen ine tom·anio Skotong Minister aganangaha.

Ia project-ko nambate kam ka·na man·na gita Skotong Minister, dingtangmancha e-Portal-koba a·bachengate on·angjolaha.