Gasuapara, Sep 25, 2026:Mijal September 24 tariko MDC saksa budepa saksako GHADC-ni ning·o kragija dokaha ine kobor man·soe, 4-Rongrikimgre GHADC constituency-ni Independent Candidate aro Garo Hills Independent Candidate Movement Forum (GHICMF)-ni Spokeperson, Clinton R.Marak, raken jegalataha.

Niamko rakkichina aro niamchi sason ka·china, manderang MDC-ko seoke watataha, indiba manderangni jakchi seoke watatako man·gipa mandean, manderangko jak sokpilaniara niamko pe·ani ong·aha.
Doka man·gipa maiba ong·gijako dakgenchimode, GHADC-ni security-rang gnangchim, uamangsa ua mandeko niam gita rim·na man·achim. Indiba MDC an·tangan Council-ni krong ong·eba, Council-ni niamko pe·aniara, A·chik Jatko chonnikani ong·aha, ine Marak janapataha.

A·chik Jatni niam bewalode, me·apako ba budepako jak sokna aro bilsi batako jak de·na man·ja, uni mama adasa dosi dakgipa mandeko dokna satna aro agan skie ra·na man·a. Uni gimin A·chik Jatni niam bewalo pangchake budepako dokgipa, MDC-ko, doka man·gipani ma·drang maharirang aro uni jik dedrang badi ka·na nanga aro dai gamate dolgni mahario kema bi·atna nanga ine Marak didiataha.

Maina A·chik Jatni bewalode baburangba pilak gadango janggi tanggipaba Niamko ga·changbatna man·ja aro Niamna bate dal·batja.

Uni gimin, “Chinga Garo Hills Independent Candidate Movement Forum (GHICMF)-ni gita mijalo ong·anggipa obostako raken jegala aro uandakgipa MDC-ni kosako EC-rang mamungba ja·ku de·jaode, chinga dal·en jegalaniko dakangkugen” ine Marak u·iataha.