@Garo Hills Digital News@. Oct 25, 2025. Website:: ghdnews.in

Tura, Oct 25, 2025: A·chik Holistic Awakening Movement (AHAM), CEB HQ, Tura Garo Hills-o dingtang Regional Council-ko bikotchina, Regional Council Demand Committee (RCDC) dolni dabianiko raken jegalataha.

AHAM CEB-ni President George Prince Ch Momin-ni parakatani gitade, re·anggipa October 12 tariko RCDC dol tom·e chanchirimaniko dakenba, North Garo Hills, West Garo Hills, South aro South West Garo Hills a·ja gimikni 1,987 Sq. Km. a·arangko man·chape dingtang Regional Council-ko bikotchina dabiangaha.

Ia chonbegipa a·ja Garo Hills-o indake dingtang Regional Council-ko bikotchina dabianiko jegalatenba, ian A·chikrangni man·rikgipa a·arangko aro niam bidikni ning·o man·gimin bilrangko pe·na ra·biani ong·enga ine AHAM-ni President parakataha.

“Garo Hills gimikan Indian Constitution-ni Sixth Schedule ning·o A·chikrangni man·rikgipa biaprangsa ong·a aro ia biaprangko Garo Hills Autonomous District Council (GHADC)-sa chalaienga. GHADC-ni ning·o indake, Regional Council-ko bikotna jotton ka·aniara ainni gitaba ong·ja aro niam bidikni gitaba ong·na man·jawa” ine Momin parakataha.

Garo Hills-ni a·arangko maming dakeba bakna gita A·chikrang on·jawa ine janapatenba, “Garo Hills-de A·chikrangnisa aro ia a·songko A·chik ma·gitcham pagitchamrangoniko man·rikgimin, niam bidikni ning·o chel·chakgipa ong·a. A·chikrangni a·songko darang dol ba committee-rang indake a·kangna ba bake ra·na bil dongja. Garo Hills-o iandake Regional Council-na dabianiara ra·chakna man·gijani ong·a aro niam gita ong·ja. Iako A·chik a·songo songdongenggipa A·chikrang ku·cholsan ong·e jegalanggen,” ine Momin parakataha.

Chengonin Garo Hills-o songdongenggipa gipin jatrang baksa A·chikrang, meli nangrime janggi tangenga. Uni gisepon indake A·chik a·songo apsan janggi tangrimaiani giminde A·chik a·songo bak ra·na gita dabina bil dongja ineba Momin parakataha.

Iandake RCDC dolni dingtang Regional Council-na dabianiko ra·chakjachina, AHAM, Meghalaya sorkari, a·dokni Governor aro India sorkarini Home Affairs Ministry-koba didiataha.