@ghdnews@

Dudhnoi, Nov 3, 2025. Garo Autonomous Council Demand Committee (GACDC) baksa All Assam Garo Gaonbura Association (AAGGA), Garo Students’ Union (GSU) Assam State Zone (ASZ), All Assam Garo Cultural Society (AAGCS), All Assam Garo Jatiya Parishad (AAGJP) aro gipin nangrimgimin NGO-rang, Assam a·doko State Level Wangala Festival-ko apsan tarik aro somoio damgni dake ong·atengani bidingo Sonaram Trusted Memorial Hall, Bakrapur-o tom·e chanchirimaha.

Assam sorkari skanggipa changna Restricted Holiday-ko ia bilsi dipet on·aha, jean November 7 tariko ong·engachim. Ia Restricted Holiday-ko on·ahani gimin, Assam sorkarina mittelpilskaaniko dakna gita, Assam Karbi Anglong District-ni Tinglijan Garo songo dal·begipa, State Level Wangala Festival-ko November-ni 5, 6 aro 7 tarikrango salgittam ong·atenga. Ian pilak A·chik NGO-rangni namnike tik ka·gimin ong·a.

Uni gisepon Goalpara District-ni Bhimajuli songoba, All Assam Garo NGOs Forum (AAGNF) ingipa dolrang apsan tariko State Level Wangala Festival-ko ong·atenga ine koborko man·soaha. Indiba ian Assam a·doko songdongengipa A·chik jatrangna namen jajabeani ong·enga. Uni gimin, chinga Assam-ni nangrimgimin NGO-rangni tik ka·gimin, State Level Wangala Festival-de Karbi Anglong-osa ong·enga, unosa pilak Assam-o songdongengipa A·chik ma·a paarang, chadamberang songni dilgiparang, Nokmarang, Gaonbura-rang aro Secretary-rang soktokpachina, Garo Autonomous Council Demand Committee-ni dilgipa Caverland Sangma mol·molataha.

“Chinga Wangala Festival-ko ong·atanina jegalja, indiba State ge·sao damgni State Level ine ong·ataniko chinga nangrimgimin, Assam-ni Garo NGO-rang raken jegalatskaenga, jekon A·chik jat aro pilak Garo NGO-rang namnike Karbi Anglong Tinglijan songo ong·atengachim, uni kosako damgipin State Level Wangala Festival ine ong·atanikode ra·chakna man·jawa. Ia All Assam Garo NGOs Forum (AAGNF)-ko bano aro basako jat baksa chanchie bikotaha, chinga ma·sija aro knaa dongkuja, darang NGO-rangba bakrima dongkuja da·ondipetde, ian saniba an·tangni namgnina tarigipa, “Self Styled” NGOs inesan agana man·aigen aro Assam-o donggipa Garo NGO-rangde mamingsaloba indake dakdragipa dolko ra·chakna man·jawa” ine Assam a·dokni nangrimgimin NGO-rang parakataha.