GHD News, Chokpot, 25, 2025: Chokpot jolni nangrimgimin dingtang dingtang NGO-rang jekai Garo Students’ Union (GSU), Chokpot Area Vigilance Committee (CAVC), A·chik Youth Welfare Organisation (AYWO), A·chik Holistic Awakening Movement (AHAM), Federation of Khasi Jaintia and Garo People (FKJGP) aro Garo Land State Movement Committee (GSMC), Bristibar salo Asakgre songona re·ange, niamgri cement bikotna drilling ka·na am·enganiko champengataha.

NGO-rangni parakatani gitade, India sorkarini watatako man·gipa Company-ni manderang, Chokpot Civil Sub Division-ni Civil SDO, South Garo Hills-ni Deputy Commissioner, GHADC, Mining aro Geology Department aro Forest aro Environment Department-ni maming permission ba ge·etani gri skatang niamgri Sixth Schedule a·jaona napdrae, A·chik a·songni gamrangko bikote ra·angna jotton ka·enga.

“Chinga October 18 tariko Paromgre songo koela bikotna drilling ka·aniko champengate donbaani salgipino Asakgre songo cement bikotna drilling machine-rangko ra·baskaha. Indake gitap gitap A·chik a·songna neng·nikanirangko ra·baenga. Uamang mai miksonganio Asakgre, Emandurabanda songoniko cement bikotna drilling ka·na am·enga ine sing·on, a·ningo cement dongama dongja uko nina aro a·ningo maidakgipa rong·terang donga uarangko test ka·na drilling ka·enga ine aganchakaha. Na·simangko sawa watata ine sing·on, India sorkari watata ine aganchakaha. Una Nokmako na·a permission on·ama ine sing·on, drilling ka·nade NOC on·ja, Survey ka·nasa NOC on·a ine aganskaha. Beben, company-ni manderango drilling ka·ani NOC dongja, survey ka·ani NOC-sa donga. Indide mainasa drilling ka·skaenga ine sing·on, a·ningo cement dongma dongja aro mai rokomni ro·ongrang donga uko test ka·e nina gita chinga ma·mong sorkariona watatgen ine aganchakaha. Na·simangko je sorkariba watatchina ia Sixth Schedule a·jao GHADC-ni permission gri skatang napdrae drilling ka·na niam dongja, test ka·e nigenchimoba, GHADC-ni NOC-ko nangtela, maina iade Sixth Schedule-ni a·jasa skatang napdrae kam ka·na man·jawa aro chinga NGO-rang aro songni nokni manderang iandake niamgri kamrangko ka·na on·chongmotjawa, na·simang ia kamko dontongbo ine drilling ka·aniko champengataha” ine NGO-rang parakataha.

“Chingni songo noko iandakgipa obostarang ong·engon, a·dok sorkarini gita aro District Council-ni gitaba, maimanchana gipin a·dokni manderang skatang napdrae, maming permission gri A·chik a·songni gamchatgipa a·ningni gamrangko bikote ra·angna jotton ka·enga, iani bidingo ta·rake sandianiko dakpachina chinga Chokpot jolni nangrimgimin NGO-rang aro songni nokni manderang, a·dok sorkariko aro GHADC-ni dilgiparangko mol·molatpaenga” ine NGO-rang u·iataha.

“Chinga Chokpot-ni nangrimgimin NGO-rang niamgri Asskgre-o cement bikotna miksonganiko raken jegala aro bikotna on·chongmotjawa. Manigija bikotode dal·a a·sel ong·naba donga. Uni gimin chinga bil gnanggipa authority-rang jedake GHADC, District Administration, Meghalaya Pollution Control Board, State Mining and Geology Department aro Forest and Environment Department, iandake niamgri kam ka·drana am·engani bidingo ta·rake sandianiko dakchina aro niam gita ia kamrango jak dongiparangni kosako raka ja·kurangko de·china didiatenga” ine NGO-rang parakataha.

Chokpot-ko ong·telaigipa bakrangni gimin aro nitogipa tourist biaprangni gimin mingsinga. Bang·a gipin a·songni tourist-rang biap nina re·baengani gimin, songni nokni manderang uarango pangchake janggi tangna gita cholrangko man·paenga aro tourist-rangni re·baanichi manderang bang·a namgnirangko man·enga. Uni gimin, iandake namgijagipa kamrangko ka·e manderangko gisik saatani pal tourism-ko namdapatna aro environment-ko ripingnasa nangenga. Indiba, songni manderangna namgipa janggi tangani cholrangko ra·baani pal batesa changni chang niamgri koela aro cement bikote a·ningni gamrangko nosto ka·nasa jotton ka·skaenga ine NGOrang suk ong·gijaniko parakataha.

Uni gimin mande ra·ako man·na kragipa a·dokni Skotong Minister, Forest aro Environment-ni Minister, Mining aro Geology Department, ia obostani bidingo ta·rake nirok sandianiko dakpachina NGO-rang didiataha.

“Chinga chingni a·dok chigako, chiring chibisikrangko, chibimarangko, environment-ko name ripingna aro chel·chakna dakgrikgen. Chingni Aman a·songko ong·gija kamrangchi gimaatna on·jawa. Chinga democracy-ni niamo pangchake Aman a·songna dakgrikangkugen. Niam gita namgija kamrangko ka·enggiparangni kosako ta·rake raka ja·kuko de·ja ong·ode, chinga mikkangchi rakbata ja·kurangko de·angskagen” ineba NGO-rang mikkrakataniko on·ataha.