Shillong, Nov 21, 2026: A·dokni Deficit Skulrango skigiparangni jingjengatanga ja·man, Skigiparangko ‘A·kinrang’ aro ‘Sogimin Biterang’ ine kragija kattarangchi chonnikahani gimin a·dokni Deputy Chief Minister Prestone Tynsong-ko dingtang dingtang NGO-rang aro mongsongbate skigiparang jegalgrimtokengon, uni agangipa kattarangna, Tynsong-ko kam watchina Voice of the Peoples’ Party (VPP) dabiangaha.
Skigiparangni kosako uni agangipa kattarangara, namen ra·chakna man·gijagipa aro kragijagipa kattarang ong·achim. Uni skigiparango kema bi·aiachide, uni agangipa kattarangko kimitna man·jawaha aro ua an·tangni kragijagipa kamna, Deputy Chief Minister-ni kamko wate on·na nanga ine VPP-ni President Ardent Miller Basaiawmoit parakataha.
Iani bidingo kobor ra·timgiparangna aganengon, Tynsong-ni agangipa kattarangara, songsalko rikgipa aro chatro chatrirangko mande ong·atgipa skigiparangni kamkon ‘chonnikaha’ uni gimin ua kamtangko watna nangchongmota ine Basaiawmoit dabiangaha.
“Skigiparangni kosako iandakgipa chonnikani kattarangko agananiara, Deputy Chief Minister-ni kragijagipa kamko mesokani ong·aha. Chinga iako party-ni gita raken jegalenga, maina pilak biaprangon skigiparangko a·songko rikgiparang gitasa mande ra·engon, a·doko indake skigiparangko chonnikaniara a·dokni dilgiparangna namen kratcha·beaniko ra·baani ong·aha,” ineba ua aganaha.
Tynsong-ko kema bi·china dingtang dingtang dilgiparang dabitokengon, ua an·tangni agangipa kattarangna an·tangan kratcha·na nanga aro kamtangko wate on·na nanga ine VPP President dabiangaha.
“Skigiparangni kosako indake chonnikani kattarangko aganahani gimin, uni kema bi·amangmangde chu·ongjawa. An·chingni dedrangko mande ong·atgipa skigiparangkon chonnikaha ong·ode, ua an·tangni office-o asongna krajaha. Ua kamtangko wate on·na nangchongmota,” ine Basaiawmoit aganaha.

