@ghdnews.in@

Williamnagar, Feb 12, 2026: A·chik Holistic Awakening Movement (AHAM) Dobu Regional Unit, gipin jatrangni songo noko niamgri nappruprue bading chiwalanirangko aro kam ka·anirangko champengna A·king Nokma niamrangko tarichina, Dobu-ni A·king Nokma Stewel N.Marak-ko mol·molataha.

AHAM Dobu Unit, indake seataha, “Nangni A·dok Chigao niamgri napdrae, bading chiwalenggipa aro kam ka·enggipa gipin jatrangko champengsochina, chinga, AHAM Dobu Regional Unit, Dobu-o songdongkamenggipa manderangni palo mol·molna sika” ine parakataha.

Songo noko gipin jatrang ba Non-Tribal-rang Trading Licence gri aro Hawkers Licence gri skatang songo nokona napbae nokantiona re·rurue pala sim·anirangko aro bading chiwalanirangko champengsrangchina, AHAM Dobu Regional Unit, Nokmako didiataha.

Gipin jatrang A·chik songrango skatang naprurue dingtang dingtang bosturangko pala sim·anirangko dakna niam dongja. Uamangko antidamo palna sim·na cholko on·aniara dal·a gualani ong·a. Niamgri bading chiwalaniara sorkarini niamko pe·asan ong·aija, indiba songo noko songdongenggipa manderangna kenchakaniba ong·a.

A·chikrang pilak rika cho·anirangko dakan baksa dingtang dingtang kamrangko ka·na gipin jatrangko jakkalna nangenchimoba, uamang badia songoni re·baa, sani depante, mai kam ka·na re·baa, uko ma·sina gita uamang sakprakan, Nokmani ba Gaonbura ba Sordar-ni see jote on·gipa lekka baksa photo dongchapgipa lekkarang jekai voter ID, Aadhar Card, mobile number aro uandakgipa lekkarangko zerox ka·e, Nokma/Sordar/Gaonbura-rangna on·chengani ja·mansa songo noko kamrangko ka·na on·china gitaba Nokmako didiataha.

A·doktang chigatangko gipin jatrangoni chel·chakna, a·sel ong·gnirangoniko naljokna, simsaksoanian nambatsrangipa chol ong·a, ine janapatenba, Nokmani A·king Gore-o donggipa song ba gittimantini President ba Secretary-rangna nirok simsakchina ge·etaniko on·china gitaba AHAM mol·molataha.