@ghdnews.in@

Shillong, Feb 12, 2026: Jaintia Hills Muster Roll Labour Union (JHMRLU)-ni Joint Action Committee (JAC), salanti hajira kam ka·e cha·enggiparangna namgnirangko on·gipa Labour Code, 2025-ko ra·gatna ja·ku de·jaengani gimin Meghalaya sorkarini kosako an·tangtangni suk ong·gijaniko parakataha.

“Re·anggipa November 2025 dipetonin, Meghalaya sorkari a·doko labour code-ko ra·gatna maming u·iataniko on·kujaniko nike chinga aiao inmana,” ine Joint Action Committee-ni (JAC)-ni Adviser Bah K. Pariat Budbar salo kobor ra·timgiparangna aganaha.

Labour Code-ni bidingo, chinga sandie niahaon a·dokni niamrangko tarienga ine Labour Department, chingna parakataha, indiba jadokrang batangahaoba, uamang iako ra·gatna man·kuja. Ian namen dukni ong·a, maina Muster Roll Worker-rang salantian kamrangko ka·enga, indiba Labour Department aro Meghalaya sorkari iani bidingo dal·e ra·jaenga”, ine ua aganaha.

India sorkarini on·gimin Labour Code 2025, Muster Roll ka·giparangna dingtang dingtang namgnirangko jekai Pension, Employee Provident Fund (EPF) aro Social Security-rangko on·a. Indake ong·genchimoba, Union-ni changni changa memorandum-ko on·ahaoba, Meghalaya sorkari uko ra·gatkuja. Sorkarini iako ja·ku de·jani a·sel, Muster Roll-rang, uamangni nangchongmotgipa bosturangni damrang rakani gimin janggi tanganio namen neng·nikanirangko man·enga ineba Pariat aganaha.

Uandake, EPF-ko ra·gatjani aro India sorkarini nangchongmotgipa bosturango GST-ko komiatani ja·manba, Consumer Index Price (CIP)-ni bidingo maming u·iataniko on·kujani giminba, Union-ni manderang janapangaha.

“Do·chi rongsako gong 10 aro dal kg-prako gong 100, ian gipin a·dokrangona bate dam rakbata” ine Pariat aganangaha.

“A·dokni Skotong Minister Conrad K Sangma an·tangan agangrikaniko dakna chingko okamataha, indiba da·ona kingking maming ja·kuko de·kujaniara, chinga Muster Roll Worker-rangna namen dukni ong·a” ineba Pariat aganaha.