@ghdnews.in@

Tura, Jan 20, 2026: West Garo Hills a·jani Barenggapara Sub Division-ni ning·o ga·akgipa
Rimrangpara-oni Allagre songona, Norang chibimako kabatgipa RCC dollongko ru·uta bilsirangna matchotchipgija galchipae donenga ine Sairill D Marak u·iataha.

Sairill Marak-ni u·iatani gitade, ua dollongko Asugre gita Deku-ona aro gipin songrangona re·gipa dollong ong·achim. Indiba ua nangchongmotgipa dollongko galchipanichi jolo songdongenggipa manderang namen neng·nikaniko man·enga.

Uni gimin, PWD Department aro a·dok sorkari ia dollongko ta·rake nirokatenba, matchotatchina Sairill Marak didiataha.

Ia nangchongmotgipa dollongko matchote on·genchimode, jolni manderangna namen dakchakbeani ong·gen ineba Marak parakataha.

Indake ong·engon, ia dollongko maini indita bilsirangna galchipe donenga, uko ma·sina gita re·anggipa January 16 tariko Barenggapara PWD Office-o RTI ka·aha ineba Marak parakataha.