Tura, Oct 22, 2024: Bang·gija salrangna skang, Bangladesh a·songni Babelakona songo, A·chikrangni nokdang ge·gniko chadrapanina A·chik Conscious Holistically Integrated Krima (ACHIK) Council raken jegalataha.

Koborko man·soani gitade, re·anggipa October 15 tariko, Bangladesh a·songni Babelakona songo, Bisso Mree, Eva Mree aro Stanton Mree mangni nokdangko man·chape nokdang ge·gniko ma·sina man·gijagipa manderang chadrapaha.

Iani bidingo Kolkata-o donggipa Bangladesh People’s Republic-ni Deputy High Commission-na badi ka·e sedoatenba, “Indake Bangladesh a·songo songdongenggipa A·chikrangko chadrapanichi A·chikrangna kenjagokani ong·enga. Bangladesh a·songo songdongenggipa A·chikrangko indake chadrapaniara mandena on·gimin bilko pe·ani ong·a aro Bangladesh a·songo songdongenggipa A·chikrangko onchepani ong·a” ine ACHIK Council suk ong·gijaniko parakataha.

Bangladesh a·songo songdongenggipa A·chik nokdangrangko chadrapanina jegalatenba, dos dakgipa manderangko ta·rake rim·china aro mikkangchi indakgipa a·selrang ong·taijachina ua a·selni bidingo namedake sandianirangko dakchina ACHIK Council didiataha.

Bangladesh a·songo songdongenggipa A·chikrang aro gipin chonchongipa Tribal manderangko chel·chakchina gitaba ACHIK Council, Bangladesh sorkariko didiataha.