@ghdnews.in@

Tura, Jan 16, 2026: West Garo Hills a·jani Araimile Pulis Station-ni ning·o ga·akgipa Walbakgre-oni me·chik sakgniko Social Media-o matnange post ka·ani gimin,
Mebi R Marak aro Sheiela Ch Sangma Araimile Pulis Station-o badi ka·doangaha.

Me·chik sakgnini Araimile Pulis Station-ni officer-in-charge-na badi (FIR) ka·gipa lekkao janapatani gitade, Tribal me·chik, gipin jat me·asako bia ka·atani ja·man, January 12 tariko, Social Media-o gipataha. Ua me·chik aro me·asako Tura Holy Cross-o bia ka·ataha ine Social Media-rango gipatahaoba, uan St Luke Church-osa bia ka·ataha ine badi ka·gipao ba FIR-o janapataha.

Ua me·chik aro me·asako bia ka·atanio uamang sakgnide maming bak dongpaja aro bia ka·na maharirangni tom·anioba, uamangde dongpaja ine janapatenba, uamang an·tangtangde ua bia ka·ani bidingo manderangni jangbingbanganikosa knasoaha aro maharirang an·tangtangsa, ua me·chik aro me·asako bia ka·ataha ine me·chik sakgni, FIR-o parakataha.

Iani bidingo name sandichenggija aro uamango sing·sandichenggija badiaba manderang, uamang sakgniko matnange, ‘ACHIK HQ TURA’ ingipa Facebook page-o post ka·ataha ineba FIR-o parakaha.
Kakketko ma·sichenggija uamangko matnange social media-o post ka·atahani gimin uamang, manderangni kragija dake intek-soltekako man·ahani gimin suk ong·gijaniko parakatenba, uamangko kragija kattarangchi matnange post ka·ahani gimin ‘ACHIK HQ TURA’ Facebook page-ni Administrator aro uano jak donggipa gipin manderangni kosako rakgipa ja·kurangko de·china, me·chik sakgni, pulisrangko didiataha.