@ghdnews.in@

Shillong, Jan 15, 2026: A·dok sorkarini parakatani gitade, pilak a·jarangon, District Selection Committee (DSC)-ni ning·o pilak kamrangna dorgasto galenggipa candidate-rang a·jatangni ba joltangni ku·sikko jakkalna nangtelgnok.

Personnel Department-ni Commissioner & Secretary CVD Diengdoh-ni u·iatani gitade, iana skang on·gipa Office Memorandum-ko ja·rikani ong·enga aro je district ba a·jaon, DSC-ni kamna dorgasto galengachim, ua a·jani kri candidate-rang jolni ku·sikko pass ka·gipa ong·na nanggnok.

Khasi aro Jaintia Hills a·jao kamna dorgasto galenggipa candidate-rang, Khasi ku·sikko sena aro poraina ong·na nanggen aro Garo Hills-oba kamna dorgasto galenggipa candidate-rang, Garo ku·sikko sena aro poraina ma·giparang ong·na nanggen ine sorkari official parakataha.

“District selection committee (DSC)-ni ning·o kamna dorgasto galenggipa candidate-rang, kamna galengon, a·jatango jakkalgipa ku·sikko ma·sigipa ong·na nangtelgnok aro ku·siktangko porikkarango pass ka·gimin ong·na nanggnok,” ine sorkarini on·gipa office memorandum parakataha.

Khasi Hills-o dam 5 a·jarang aro Jaintia Hills-ni damgni a·jarango Khasi grammar aro composition-ko nangtelgipa ong·ate, Syllabus-ko tarina siengaha aro Garo Hills-ni dam 5 a·jarangoba Garo subject dongskagen.

“District level-o kamna seokako man·gipa manderang, jolni manderang baksa nambate agangrikna aro kamrangko nambate ka·na man·na gita ia niamko tariaha,” ine Personnel Department-ni official aganaha.