@ghdnews.on@

Tura, Jan 14, 2026: Re·anggipa January 9 tariko ma·sina man·gijagipa manderangni ka·saninggija chadrapako man·e sianggipa Matgrik Dilseng M.Sangma sagiko mande ra·e, Butbar attamo mombatirangko so·enba, Tura Super Market-o bi·chakaniko dakangaha.

Ia candle light service ba mombatirangko so·e bi·chakaniko, Durama Imbama Norimbi Dikkimbi A·chik Ma·giparang (DINDAM) ong·ataha aro ia program-o dingtang dingtang toromko dilgiparang baksa GSMC, AIGU, NGCO, NTDF, TSCF, GGU, AAYF aro ACHIK Organisation dolrangni dilgiparang dongpae bak ra·angaha.

Ia tom·anio bak ra·gipa sakantian, dikdiksana jrip donge Dilseng sagiko mande ra·angaha aro mombatirangko so·enba bi·chakaniko dakan baksa uni ka·donganiko gisik ra·atpile, una kakket bichalko ka·e on·china district administration aro pulis department-ko didiangtomaha.

Tura Super Market-o dokkan dakenggiparangba una mande ra·aniko mesokna dokkantangtangko chipenba bi·anio bak ra·angtokaha.

Dilseng M Sangma sagi, A·chik Conscious Holistically Integrated Krima (ACHIK) dolni saksa dilgipa ong·achim aro batanggimin January 9 tariko, West Garo Hills a·jani Rajabala jolo donggipa Goalgaon songo niamgri ro·ong bikotenganiko champengna gita uni dolni dilgiparang baksa re·angaha. Uandake uamangni re·bapilengmiting somoio u·ina man·gijagipa manderang jinma ro·ongrangko donpengsoe ro·ong, atte, rua aro jompolrangchi uamangko chadrapani selan Dilseng M. Sangma, bilongbee saknaako man·ahani gimin uko hospital-o sanna ra·bamitting somoion, ua rasonggribee a·gilsakko watangaha.