@ghdnews.in@

Tura, Jan 13, 2026: Re·anggipa January 9 tariko West Garo Hills a·jani Rajabala jolo donggipa Goalgaon songo, A·chik Conscious Holistically Integrated Krima (ACHIK) Organisation-ni member-rangko chadrapanio, member saksa Dilseng M Sangma-ko ka·saninggija doke so·otanio jak donggipa manderangko pulisrang sandiengon, Robibar salo, saksako rim·dapna man·aha aro ua a·sel ong·anio rim·ako man·giparang gimik sakbri gapengaha.

Re·anggipa January 9 tarikni 2 bajimano, Rajabala jolo niam gri ro·ong bikotenggipa quarry-ko chipate donbaani salgipino uko nirokna re·ange re·bapilengmiting somoio ACHIK Organisation-ni member-rangko Goalgaon songo, dolsa ma·sina man·gijagipa manderang champengsoenba, ro·ong, rua, jompolrangchi chadrapsoaha aro ua manderangni chadrapanichi, ACHIK dolni member-rangoni saksa Dilseng M Sangma, rasong gribee so·otako man·ha.

Ia a·sel ong·ani ja·man, dos dakgipa manderangko ta·raken rim·china aro rakgipa sastirangko on·china dingtang dingtang dolrang dabitokengani gimin,
ua a·sel ong·ani ja·man pulisrang, sakgittam manderangko skanggipa salon rim·na man·aha aro uni ja·man, jatgnini gisepo tom·tomaniko rakkina gita Tura, Phulbari aro Rajabala-o tom·tomanina jinma tom·e chanchirimangaha.

Indake ong·genchimoba, niam gri ro·ong quarry-ko chalaienggipa mandede, pulisrang uni nokona re·angna skangan, kate chakaha aro ua mandeko pulisrang da·onan rim·na gita man·skakujaenga.

Dos dakgipa manderangko pulisrang sandienba, saksako Robibar salo rim·na man·aha aro ua a·selna rim·ako man·giparang gimik sakbri gapengaha ine u·iataha.

Ia a·selo jak donggipa pilak manderangkon pulisrang rim·na gita sandienga aro ua manderangko ta·raken rim·na man·gen ine pulisrang u·iataha.