@ghdnews.in@

Tura, Jan 13,2026: Re·anggipa January 2 tariko Education Department-ni skulrango jakkalgipa textbook-rangko tariani, chapa ka·ani, baseani, question paper-rangko tariani aro uandakgipa kamrangko Directorate of Educational Research & Training (DERT)-ni ning·o on·skaaha ine u·iataniko North Garo Hills a·jani Bajengdoba jolo donggipa dingtang dingtang NGO-rang jegalatani ja·man, MBOSE-na on·gimin bilrangko da·o DERT-ni ning·o on·aniara, MBOSE-ko bilgriatna jotton ka·anisa ong·enga ine, A·chik State Peoples’ Front (ASPF) CEB, HQ, Tura matnangataha.

ASPF-ni parakatani gitade, Meghalaya Board of Skul Education (MBOSE) Act, 1973-ara dingtangmancha MBOSE-na bilko on·na aro chalaina, Legislature-ni on·gimin niamsa ong·a aro ia Act-ni Section 12-ni ning·o MBOSE-ara, textbook-rangko tarina, chapa ka·na basena aro nanggipa bosturangko on·an baksana porikkarangko ra·na aro Meghalaya a·doko skul education-na academic standard-rangko nirokna bilko man·ahachim.

Ia bilrangara, ainni ning·o on·gimin bilrangsa ong·ani gimin executive memorandum-ko on·anichide ra·pilna ba bilgriatna man·gipa bilrang ong·ja. MBOSE-na on·gimin bilrangko DERT-na pakwatanichi a·dokni Education Department, Indian Constitution-ni Article 162-ko pe·ani ong·enga ine ASPF parakataha.

Right to Children to Free & Compulsory Education Act, 2009-ara, skul aro college-rangna bilko on·gipa ong·genchimoba, ian a·dokni niam ba aino bikotgipa State Board-rangni bilrangko siatnade man·ja, ineba ASPF parakataha.

MBOSE-ara skangonin Meghalaya a·doko donggipa Garo Hills aro dingtang dingtang Tribal jolrangna pangchakani bimang gita ong·a aro ian jolni nangani, ku·sikrang aro lekka porako chalaienggipa ong·a ine janapatenba, MBOSE-ni bilko bon·ataniara, bite nangna sienggipa bolni ja·dilkon den·sote gala gita ong·enga ine ASPF parakataha.

Uni gimin, MBOSE-na on·gimin bilrangko DERT-na on·skaaniko ra·pilchina, State Legislature ba a·dokni aino taridapkujaskal MBOSE Act, 1973-ko raken ja·rikkuchina, didiatenba, iandakgipa ja·kurangko de·na skang, a·doko songdongenggipa manderang aro dingtang dingtang dolrang baksa chanchirimchengchina, ASPF dabiangaha.