@ghdnews.in@

Tura, Jan 12, 2026:Re·anggipa January 10 tariko, West Garo Hills a·jani a·kawe jolo niam gri bikotenggipa ro·ong quarry-ko chipatna kam ka·enggipa A·chik Conscious Holistically Integrated Krima (ACHIK) Organisation-ni dilgiparangko chadrape, member saksako jinma dokgrime siatani ja·man, ua jolrango niamgri bikotenggipa ro·ong quarry-rangko chipatchina Tura-ni MDC aro Bharatiya Janata Party (BJP)-ni State Vice President Bernard N Marak, a·dok sorkari, GHADC aro Forest department-ko didiataha.

Tura songjinmao, Tribal ong·gijagipa manderang bang·batan nangchongmotgipa lekkarang gri bading chiwaltokenga ine Marak matnangatenba, ua manderangna skatang bading chiwalani licence-rangko on·jachina gitaba Marak Garo Hills Autonomous District Council (GHADC)-ko didiataha.

Ua a·sel ong·aniara, Bhaitbari Goalgaon jolo niamgri bikotenggipa ro·ong quarry-ko niroke re·bapilengmiting somoio, ACHIK Organisation-ni dilgiparangko ma·sina man·gijagipa manderang rang·san chadrapenba, ACHIK Organisation-ni member saksa Dilseng M Sangma-ko jinma dokgrime siatahani gimin, suk ong·gijaniko parakatenba, dos dakgipa manderangko ta·rake rim·enba, uamangni kosako rakbatgipa sastirangko on·china Tura-ni MDC didiataha.

“Ia gital bilsini somoio an·chingni a·kawe jolo A·chik chadamberangko doke sate janggi ra·ahaniko anga raken jegala, maina ian an·chingni ning·o ong·na nanggipa manderangsa ong·achim, indiba an·chingni kosako chakatpile bil-jakko mesokani ong·enga. Ian uamangni A·chik a·songo kengijaniko aro niamgri kam ka·e an·chingko kenatpilna jotton ka·aniko mesokani ong·a. Uni gimin ia kamko anga raken jegalan baksana ua jolrango niamgri bikotenggipa ro·ong quarry-rangko chipatchina a·dok sorkari, GHADC aro Forest Department-ko didiatna sika,” ine Marak parakataha.

District Council-ni nangchongmotgipa lekkarangko on·jagenchimode, Non Tribal manderang, Garo Hills-o songdong a·chana man·ja aro bading chiwale cha·naba man·jawachim, ine janapatenba, GHADC-ni Forest, Taxation aro Land & Revenue department-rangko, gipin jatrangna, mongsongbate Tribal ong·gijagipa manderangna skatang licence aro a·a pattarangko on·jachina gitaba Tura-ni MDC didiataha.

“Tribal ong·gijagipa manderangna skatang a·a pattarangko aro bading chiwale cha·ani licence-rangko on·engani a·selsa da·alo A·chik a·songo gipin jatrang jelrorona aro bilko mesokna a·bachengengaha, uni gimin, mikkangchi iarangko raken champengna nangchongmotengaha,” ineba Marak parakataha.