@ghdnews.in@

Tura, Jan 11, 2026: Garo Hills-ni dingtang dingtang NGO-rang, Civil Society Organization-rang re·anggipa January 9 tariko Rajabala Pulis Station-ni ning·o ga·akgipa Bhaitbari Goalgaon songo ACHIK Organisation-ni dilgiparangko ma·sina man·gijagipa manderangni chadrapanio ACHIK Organisation-ni member saksa Dilseng M.Sangma-ko jinma dokgrime siatanina raken jegalattokaha.

Garo Hills-ni dingtang dingtang NGO-rang jedake GSU-CEC, HQ Tura (Tengsak), FKJGP Garo Hills, Zone, NGCO HQ Simsanggre, CSAWO HQ Ampati, GSMC HQ Tura, ADIL Western Zone Phulbari, GSU-CEC HQ Tura (Zikku), GSU Western Zone (West) Raksamgre, AAYF HQ Tura, Northeast Indigenous Peoples’ Association, AMMSU, Bhaitbari Goalgaon-o a·sel ong·aniko jegalatenba, dos dakgipa manderangko ta·rake rim·enba, uamangni kosako rakgipa jsastirangko on·china dabiangtokaha.

Indake A·chik a·songo donggipa a·ningni gamrangko niamgri bikotanirangko, District Administration aro Garo Hills Autonomous District Council (GHADC)-ni authority-rang, niamgri rong·terangko bikotenga ine kobor man·ahaoba, maming ja·kurangko de·jgija aro champengatgija donani a·selsa da·alo indakgipa obosta ong·aha ine NGO-rang matnangatenba, suk ong·gijaniko parakaha.

West Garo Hills a·jao donggipa Singgimari, Chatibui, Tangaon, Rajabala aro Phulbari jolrango ru·uta somoirangonin niamgri ro·ong bikotanirangko, dingtang dingtang biaprango niamgri bol ratani karkana-rangko chalaienggiparang, Garo Hills-ni bolrangko cha·ue, gipin a·dokrangona watatanirangko nikomangba, District Administration, Forest Department aro GHADC mamingkon ja·ku de·ja ineba NGO-rang matnangataha.

Authority-rang simsakjani a·sel da·alo iandakgipa obostako chagrongna ga·akaha aro chadambe saksa an·tangni gamchatgipa janggiko gimaatna nangaha. Uni gimin mikkangchi niamgri a·ningni gamrangko bikotenggipa manderangni kosako rakbatgipa ja·kurangko de·na nangchongmota aro ro·ong bikotani mamlarangko namedake sandichina NGO-rang didiataha.

Uni gisepon, authority-rang iani bidingo mamingkoba ja·ku de·jagenchim ong·ode, democracy-ni bewalo ja·kurangko de·angskagen ine NGO-rang parakataha.

Uandake ADIL Western Zone Phulbari-ba ia a·sel ong·aniko jegalatenba, re·anggipa January 6 tarikon, ACHIK Organisation-ni Facebook Page-o niamgri ro·ong bikotaniko pilaknan u·iatmanahachim, indiba maini gimin department-ni authority-rang iani bidingo sandianiko dakja aro maming ja·kurangko de·skaja ine ADIL Western Zone-ni Chairman Jack Sangma sing·doatskaha.