@ghdnews.in@

Shillong, Dec 14, 2025: Meghalaya a·dokni gitcham Skotong Minister aro TMC-ni dilgipa Dr. Mukul Sangma, NPP dolo napnaba donga ine jangbinganirang kakket ong·ja, tol·e jangbinganisan ong·aia ine NPP-ni dilgipa jegalataha.

NPP dolni u·iatani gitade, da·o dipet uamangni party aro Dr. Mukul Sangma-ni gisepo officially maming agangrika dongja aro dolgnian maming politics-ni bidingo kobor ra·grikanirang dongkuja.

Indake ong·engon, ua NPP-ni gipin dilgiparang baksa agangrikanirangko dakengnaba donga, indiba uni NPP-o napani bidingode, mamingba janapani dongkuja ine u·iataha. Iani gisepon, saoba party-o napna sikgenchimoba, NPP dol nokchaksoaigen ineba parakataha.

Social Media-rango Dr. Mukul M Sangma, NPP dolo napna miksongenga ine jangbingbanganichi, Garo Hills Autonomous District Council (GHADC)-ni election ong·na siengon, ia jangbinganirang giproroangaha. Indake ong·engon, Dr. Sangma aro NPP-ni dilgiparang iako kakket ong·a ine agankuja.

Politics-ni bidingo u·i ma·sigiparangni aganani gitade ian ong·nagipa ba ong·janagipa ong·a, maina Meghalaya a·doko TMC dol, bang·a dilgiparangni watgalangani a·sel bilgriroroangengaha. Ru·utgija somoirangna skangsan Dr. Mukul M Sangma-ni jonggipa Zenith Sangma, Congress dolo napangaha.

Indake ong·engon, Dr. Mukul Sangma aro NPP-ni padot Conrad K Sangma sakgnian Garo Hills-ni bil gnanggipa dilgiparang ong·a. Politics-o haida uamang sakgni apsan party-o donge kam ka·genchimode, nambatgipa ong·genchim.

NPP dolni gita da·o dipetde Dr. Mukul Sangma-ni NPP dolo napna am·enga ine jangbinganisan ong·aia ine parakataha.