Shillong, Nov 21, 2026: Adita salrangna skang a·dokni Dakchakgipa Skotong Minister Preston Tynsong-ni Jingjengatenggipa Khasi Jaintia Deficit Skul Teachers Association (KJDSTA)-ni kosako matnange Skigiparangko ‘A·kinrang’ aro ‘Sogimin Biterang’ ine kragija kattarangchi chonnike aganahani gimin, Prestone Tynsong-ko kam watchina, Voice of the Peoples’ Party (VPP) aro Trinamool Congress (TMC) dabiahani gimin, a·dokni Skotong Minister Conrad K Sangma jegalatenba, iani bidingo Tynsong, kamtangko watna nangani katta dongja ine parakataha.
Ua mai miksonganio ia kattarangko aganahachim, Tynsong an·tangan nambate talataniko on·na man·gen ineba Sangma aganaha.
Ia obostani bidingo ua, Tynsong baksa agangrikmanaha ine janapatenba, uni agangipa kattarangara, darangkoba gisik saatna miksonge aganade ong·jachim, indiba badiaba saksa sakgni manderangni giminsa aganachimkon, ine Skotong Minister talataniko on·atskaha.
Ia kattarangko ua an·tangde aganjaenga, indiba Tynsong-ni agangipa kattarangkosa aganskaenga ineba Sangma talataha.
A·doko songdongenggipa manderangni namgnina, sorkari pangnan apsan ku·monge kamrangko ka·enga aro mikkangchiba apsan daken kamrangko ka·angkugen ine Skotong Minister, parakataha.

