Shillong, Nov 21, 2026: Meghalaya a·dokni Tourism Department, Outlook & Outlook Traveller baksa nangrime, brigipa ‘Responsible Tourism Summit & Awards’ program-ko Sukrobar salo ong·atangaha aro ua program-o Meghalaya a·dokni Skotong Minister Conrad K Sangma-ba dongpae bak ra·angaha.
Ua ‘Responsible Tourism Summit & Awards’ program-ko ong·atanio a·dokni Skotong Minister jinmana aganprakengon, ia program-o bak ra·na dingtang dingtang biaprangoni re·bagipa manerangko rimchaksoenba, manderangna janggi tangani cholrangko on·na gita a·dok sorkari, Tourism-ko mongsonggipa Sector ba kam dake seokaha ine parakataha.
Dingtang dingtang biaprangoni Tourist-rang, Meghalaya a·dokni daka rikani, nitogipa biaprang, chidarerang, cha·ani ringani bewalrangko ma·sie gita re·batokenga. Tourism-ara Meghalaya a·dokna aro a·dokni manderangna, dal·roroaniko ra·bana cholrangko on·enga ine Skotong Minister aganaha.
Meghalaya a·dok gipin biaprangoni re·baenggipa manderangko sokachakgipa biapsan ong·aigija, a·gilsak gimikna Tourism-o namgipa dakmesokaniko on·na miksongenga ineba Sangma aganaha.
Re·baenggipa 2027 bilsio nina nambatsranggipa dam 20 biaprangoni damsa ine BBC Travel-ni Meghalaya a·dokko seokna am·engani gimin, ua an·tangni rasong chaaniko aro kusi ong·aniko parakatenba, ian badiaba program mingsa ba kam mingsako chu·sokatani gimin, ong·ja, indiba batanggimin bilsi 8-ni gisepo bang·a dolrangni nangrime kamrangko ka·ani a·selsa ong·aha ine Skotong Minister aganaha.
A·doko Tourism-ko apalbatatna aro a·gilsak gimikni Tourist-rangko salbana dingtang dingtang company-rang baksa nangrime sorkarini a·bachengatgipa Program aro Scheme-rangni giminba Skotong Minister aganangaha.

