Tura, Nov 8, 2026: Garo Hills-o A·chikrangni dal·batgipa maniani ba Wangalani bilsi 50 gapaniko Golden Jubilee manina tarisoanirangko mijal Sonibar salo West Garo Hills a·jani Deputy Commissioner Vibhor Aggarwal re·ange nieaha.

Uni re·ange nianio re·baenggipa November 11 tarikoni 14 tarikona salbri joljol ong·atenggipa, Golden Jubilee-ko manina tarisoenggipa Wangala A·dam-ko tarianirang bang·batan chu·sokahani gimin, ua a·dokni Skotong Minister Conrad K. Sangma-ko mittele aganangaha.

Ia Wangala A·damko apbalbate aro nambate tarina gita, a·dok sorkarini dakchakaniara, A·chik jatni daka rikani aro manianiko name ripingangna miksongani ong·a. Iandakgipa tribal manderangni dakbewalrangko tange rakkianiara, Garo Hills-osan ong·aigija, Meghalaya a·dok gimikon jatni dakbewal rikbewalrangko name ripingna nanga ine DC aganaha.

Ia dal·begipa manianiko chu·sokatna gita Wangala Festival Committee aro dingtang dingtang sorkari department-rang apsan ku·monge neng·takpilgija kamrangko ka·engani gimin, DC de·mittele aganangaha.

Wangala A·damko niangani ja·mano kobor ra·timgiparangna aganengon, ia bilsi Golden Jubilee-ko maniao Dama Bol 1000-ko Doke Wangalna tarisoanirangko chu·ongnikaha ineba ua aganaha.

Ia chango Golden Jubilee-ko manina a·dok sorkari gong kror 5.5 tangkarangko Wangala Committee-na on·atahani gimin, ua a·dok sorkarikoba mittele aganangaha.

West Garo Hills a·jani DC Wangala A·damo tarisoginim helipad-ko nianga baksana Wangala A·damoni ong·katgipa rama, Nokpante, Nok A·chik, Sa·sat Nok, PHE tangki, VIP Stage, dokkan tarigiparang, gari donchakna tarigipa aro gipin biaprangkoba niangjolaha.

Unbaksana PWD-ni tarigipa ramarangkoba niangengon, Wangala Festival Committee-ni Chairman, Secretary, Convener aro gipin member-rangni dondikgija krenge kamrangko ka·ahani gimin, DC uamangko dingtangmancha, mittelangaha.

Ua District Administration-ni palo a·doko songdonggipa manderangko ia bilsi Golden Jubilee-ko manie, Dama Nol 1000-ko Doke Chrokaniko nina re·batokchina aro A·chik jatni daka rikani aro maniani bewalrangko nie ma·sie ra·angachina sakantikon mol·mataha.