Tura, Nov 4, 2026:: Ia bilsi Dama Bol 100-ko doke Wangalani bilsi 50 gapaniko ba Golden Jubilee-ko manianiao Dama Bol 1000-ko doke Wangalaniko sokachakna tarisoenggipa Chibragre Wangala A·dam matchotengaha.

Ia Golden Jubilee-ko maniani bidingo Budbar salo, Hundred Drums Wangala Festival Committee (HDWFC)-ni Chairman Ronald Rikman Ch. Sangma aro Media Convenor Jesse James R Marak, Press Conference-ko ong·ate, kobor ra·timgiparangna talataniko on·angaha.

Dama 100-ko doke Wangalani bilsi 50 gapaniko manina tarisoani gimin talatengon, ia manianiara Garo Hills-nasan ong·aigija, Meghalaya a·dok gimiknan dingtangmanchagipa ong·enga. Ia chang Dama Bol 100 -ko doke Wangalaniko dal·bate ong·atna, gita dama bol 1000-ko doke Wangalaniko ong·atskaenga ine HDWFC-ni Chairman aganaha.

Ia manianiona, Union Culture & Tourism Minister Gajendra Singh Shekhawat, Assam-ni Skotong Minister Himanta Biswa Sarma, Meghalaya a·dokni Governor C.H Vijashankar, Meghalaya-ni Skotong Minister Conrad K Sangma aro gipin dilgiparang re·bae bak ra·angna ka·dongsoenga ineba Sangma aganaha.

Ia Wangalaniko ong·atani mongsonggipa miksonganiara A·chik chadamberang aro mikkangchi re·baenggipa chasongni manderang, jattangni chrokaniko aro daka rikaniko nie ra·enba skie ra·china mesokani ong·enga ine Sangma aganaha.

Ia chang Dama Bol 100-ko doke Wangalani bilsi 50 gapaniko apbalbatatna gita, dama bol 1000-ko doke Wangalaniko ong·atskaenga. Ia manianio, sak 1000 dama dokgiparang, sak 1000 me·chik chrokgiparang aro gipin sak 500 dakmesokgiparang baksa chroke mesokanggen ine HDWFC-ni Chairman parakataha.

Ia Wangalaniko November 11 tarikoni 14 tarikona salbri joljol ong·atenga aro ia Wangalaona manderang bang·en sokbana ka·dongsoengani gimin ia Wangala A·damko dal·bate tarisoaha ine Sangma aganaha.

Ia Wangalaniona, Kamrup, Goalpara aro Karbi Anglong-ko man·chape Assam a·dokoni dol 11 bak ra·anggen aro unbaksana Nagaland aro Tripura a·dokoniba ia Wangalanio bak ra·anggen ineba Chairman aganaha.

Ia Wangalani skanggipa salo, dama bol 1000-ko doke chrokanichi a·bachenggen aro uni ja·mano dam 300 Stall-rangni exhibition-ko oprake on·anggen.
Sangma-ni parakatani gitade, gnigipa salo, Rugalaniko dakan baksana dama bol 1000-ko doke Wangaltaigen.

Ia Wangalani mongsonggipa bakde, November-ni 13 tariko ong·gen, jeon Sa·sat So·a, bi·sarangni chrokani aro gipin dakmesokanirang donggen ine Sangma aganaha.

Ia wangalani bon·kamgipa sal, November 14 tariko, jatni kal·susaanirang, pagitcham ma·gitchamrangni ring·anirangko ong·atanggen. Indake ia dama bol 1000-ko doke Wangalani bak gita November 7 tariko km 10-ko Marathon ong·atenga aro unbaksana November 10 tariko, Indo-Bangla robol kal·susaanikoba ong·atanggen, ine HDWFC-ni Chairman parakataha.