Williamnagar, Oct 29, 2026: East Garo Hills a·jani bilsi 50 gapaniko ba Golden Jubilee-ko Bristibar salo Williamnagar Rongrenggre Govt. Higher Secondary Skul kal·chakramo maniangaha.

Ua salko maniao a·dokni Skotong Minister Conrad K Sangma mongsonggipa sokgipa ong·e bak ra·angaha. Ua East Garo Hills a·jani bilsi 50 gapaniko maniani bak gita adita project-rangkoba a·bachengate on·angjolaha.

East Garo Hills a·jako man·chengaoni da·o bilsi 50 gapaniko maniao a·dokni PHE Minister Marcuise N Marak, East Garo Hills a·jani Deputy Commissioner Rapsin P. Marak , Superintendent of Pulis (SP), dingtang dingtang official-rang, MDC-rang, toromni dilgiparang, bang·bea jolni manderang, Skul aro College-ni skigiparang aro chatro chatrirang dongpae bak ra·angtokaha.

Indake tom·anio Skotong Minister, jinmana aganprakengon, ian East Garo Hills a·jani bilsi 50 gapaniko maniani ong·a aro da·alo Williamnagar town-ni namroro silroroanina re·mikkanganiko nipilani ong·enga ine ua aganaha.

East Garo Hills a·jani bilsi 50 gapahani gimin, ua an·tangni kusi ong·aniko parakangaha aro East Garo Hills a·jako Meghalaya a·dokni skanggipa Skotong Minister Captain Williamson A Sangma-ni bimingchin Williamnagar ine mingaha. Unbaksana East Garo Hills ja·jako man·na gita ja·ku de·anio Pa Choronsing A Sangma, Pa Lolith R Sangma, Rev. M Marak aro gipin pagitchamrang bang·en on·gilangaha ine Skotong Minister aganangaha.

Unbaksana dingtang dingtang sorkari office-rangko rikna an·tangtangni a·arangko kusi ong·e on·ahani gimin, Sangma dingtangmancha Williamnagar-o donggipa dingtang dingtang A·king Nokmarangko mittelpilangskaha.

Tom·anio Skotong Minister, Williamnagar Higher Secondary Skul aro taridapgipa Multi Purpose Indoor Sports Hall-koba oprake ba kulie on·angjolaha.

East Garo Hills a·jao rama jal·langrangko tarie on·ani gimin parakangengon, rama jal·langrangko tarianichi, East Garo Hills a·jao namroro silroroaniko aro dal·roroaniko ra·bana dakchakani ong·gen ine Skotong Minister aganaha.

Uandake, tom·anio Skotong Minister, Rongrenggre Simsanggre-Nengkhra ramako tarian baksana Rongronggre dollongkoba oprake on·angjolaha.