Tura, Oct 27, 2026: North-Eastern Hill University (NEHU) Tura Campus-o poraienggipa Post-Graduate Students’ Union (PGSU) ma·mongoni on·atgipa gong kror 45 tangkarang gimaengani gimin, administration-ko chu·onga gita nirokna man·jaenga baksana kam ka·gipa (staff)-rang chu·ongjaengani gimin NEHU-ni Vice Chancellor-na chitti sedoataha.

Ia tangkarangko 2025–26 bilsina Pradhan Mantri Jan Vikas Karyakram (PMJVK)-ni ning·o Ministry of Minority Affairs-oni chamatahachim. Ua tangkarangara campus-ko apbalbatatna, chatro chatrirangni hostel-rangko rikdapna aro auditorium-ko rikna gita on·ataha. Iani bidingo re·anggipa September 14 tarik 2026-o Ministry of Minority Affairs-oni show cause notice on·ani ja·manosa rika cho·anirang chu·ongja aro agre ru·utatani gimin tangka paisarangni gimaaniko ma·sina man·aha ine PGSU parakataha.

Administration-ni kamrangko ru·utate donangkua ong·ode, je project-rangna chamatgimin tangkarangko walpilatenba, bon·chipataona soknaba donga ine PGSU kenchakaniko parakataha.

Ia project-rangna agreba Tura NEHU campus-o bang·a neng·nikanirang jekai faculty staff-rang chu·ongjani a·sel, kamrangko bangbang donenga aro uarangko temporary basis-o pangchakenga. Regular-ni biaprangko bangbang donanichi skia porani, research ka·ani daka rikanirang chu·gimik standard ba gadangna jajrengani ong·enga ineba PGSU parakataha.

Non-teaching staff-rangba chu·ongjani a·sel admission-na, porikkarangna, scholarship-ko check ka·na aro account-rangko nina ru·utatani gimin, dongpagijagipa nokdangni dedrangna neng·nikani ong·enga ineba u·iataha.

Unikoa, Head Quarter baksa nangrime kam ka·anio ja·manchakani ba chu·ongjani a·sel Academic-na aro Finance-na sakprak Deputy Registrar-ko rakkichina gitaba PGSU dabiangaha.