Tura, Oct 26, 2026: Meghalaya a·dokni skanggipa Skotong Minister aro Garo Hills Autonomous District Council (GHADC)-ni skanggipa Chief Executive Member (CEM) ong·chenggipa Captain Williamson A. Sangma-ni chang 36-gipa siani salko Robibar salo Tura William Point-o maniangaha.

Ia salko manianio, a·dokni Cabinet Minister Marcuise N Marak, mongsonggipa sokgipa ong·e bak ra·angahs. Marcuise Marak tom·anio jinmana aganprakengon, Meghalaya a·dokko man·na gita Capt Sangma krengdilaha aro uni janggi tanga gimik Garo Hills-ni manderangna dangdike on·angaha.

Capt Sangma-ni janggi tanganio kam ka·anirangko gisik ra·atengon, ua saksa a·songko aro jatko dilna changgipa ong·e, Meghalaya a·dokko man·kuja dipet kingkot kamko ka·dilaha ine Marak aganaha.

All Party Hill Leaders Conference (APHLC)-ni President ong·e, Capt Sangma, Meghalaya a·dokko man·na krengdilaha.
Meghalaya a·dokni skanggipa Skotong Minister ong·an baksana Capt Sangma, GHADC-niba skanggipa CEM ong·e, Garo Hills aro Garo Hills-ni manderangna bang·a namgniko on·gilangaha ineba Marak aganaha.

Capt Sangma-ni kamrangko daksningna, uni mingnamako rakkiangna aro Meghalaya a·dokko chubata gadangona ra·doangna gita ku·cholsan kamrangko ka·angchina Marak, a·doko songdongenggipa manderangko didiangaha.

Indake tom·anio, GHADC-ni CEM Dhormonath Ch Sangma-ba dongpae jinmana aganprakengon, Meghalaya a·dokko man·na gita Capt Sangma-ni on·gilanirangko gisik ra·atenba, Autonomous District Council (ADC)-ko man·anio uni rike donanggipa kamrangko janapangaha.

Ia tom·anio, Hawakhana Baptist Mondolini dakchakgipa Pamong Raksal D Marak, Isolo bi·e pattianiko on·angskaaha.

Uandake program matchotani ja·man, Captain Sangma-ni gopramona re·ange, pulrangko gopramo done, una Isolo bi·chakenba mande ra·aniko dakangaha.