Tura, Oct 8, 2026: Ia bilsi Dama Bol 100-ko Doke Wangalani chang 50 gapaniko manina gita, Wangala A·dam Chibragre-o tarisamsoengako Budbar salo Meghalaya Legislative Assembly-ni Speaker aro North Tura-ni MLA Thomas A Sangma niangaha.

Ia bilsio Dama Bol 100-ko Doke Wangalani bilsi 50 gapaniko November 11 tarikoni November 14 tarikona manianggen. Ia chango dama bol 100-ni pal dama bol 1000-ko doke Wangalna gita tarisoenga.

Ia manianiko ong·atna tarisamsoaniko niangani salo Assembly-ni Speaker baksana West Garo Hills a·jani Superintendent of Pulis (SP) Abraham T Sangma, Additional Deputy Commissioner (ADC) Jude Rangku T Sangma aro dingtang dingtang sorkari official-rangba dongpaaha.

Dama Bol 1000-ko doke Wangalaniko ong·atna tarisamsoaniko niangani ja·man, Sangma kobor ra·timgiparang baksa agangrikengon, Wangala A·damo tarisamsoanirangko anga saksa joltangni MLA ong·e nina re·baha aro iako chu·sokatna kam ka·anirango dingtang dingtang rneng·nikanirangko chagrongna nanggenchimoba, kamrang matchotangengahani gimin, anga namen kusi ong·a ine Sangma aganaha.

Ia Wangalaniko ong·atna tarisamsoanio bak nangegipa department-rang aro Wangala Festival Committee baksa chanchirimaniko ua ong·ataha. Kam ka·anirang ta·aken matchotangengahani gimin ua namen chu·ongnikaniko aganangaha.

Ia chang Dama Bol 100-ko doke Wangalani bilsi 50 gapaniko maniaona salgro salaram a·dokrangoni sakbri Skotong Minister-rang sokbana sienga ine Sangma, an·tangni ka·dongsoaniko parakangaha.

Ia Wangalaona gipin a·dokrangoni Wangalgipa dolrang bak ra·ena gita ia changode man·jawa aro Bangladesh-oni Wangalgipa dolba sokbana man·jawa ine Sangma parakataha