Shillong, Oct 8, 2026:: Garo Hills Autonomous District Council (GHADC)-ni constituency-rangko sualpiltaiani gimin unia dingtang Electoral Roll-ko tarianirang matchotkujaengani gimin, GHADC-ni term-ko Meghalaya Cabinet Butbar salo ja 6-na ra·dodapataha.

Butbar salo Cabinet tom·ani ja·man kobor ra·timgiparangna talatangengon, GHADC-ni constituency-rangko sualpilani aro electoral roll-rangko tarianirang matchotkujaengani gimin, GHADC-ni term-ko ra·dodapna ga·akaha ine a·dokni District Council Affairs Minister Wailadmiki Shylla parakataha.

Iana skang GHADC-ni term-ko ja 6-na ra·dodapatani re·baenggipa October 17 tariko bon·engahani gimin, GHADC-ni term-ko chu·gimik bilsisana ra·dodapna bilrang donga aro Cabinet gnigipa changna GHADC-ni term-ko ja 6-na ra·dodapaniko ra·chakaha ine Shylla aganaha.

Batanggipa adita jarangna skang Garo Hills-o so·sojengjeng ong·ahani a·sel March jao, GHADC-ni election-ko ong·atna man·jahani gimin, GHADC-ni term-ko ja 6 ra·dodapna nangaha. Ua somoionin sorkari, election-ko ong·atna skang, GHADC-ni constituency-rangko sualpiltaina aro electoral roll-rangko nipiltaina kamrangko ka·enga ine District Council Affairs Minister aganaha.

Ia ja 6-na ra·dodaptaiani gisepon, GHADC-na election-ni pilak kamrangko matchotatgen ine Shylla ka·dongchakaniko parakataha.