Shillong, Sept 30, 2026: Garo Hills Autonomous District Council (GHADC)-ni term-ko sorkari ra·dodapatenba, Delimitation Committee-ko songe on·aha, ine matnangenba, GHADC election-ko ta·rake ong·atchina, Public Interest Litigation (PIL) ka·aniko Meghalaya High Court, Sombar salo ra·galaha.

GHADC election-ko ta·rake ong·atna ge·etaniko on·china Nilberth Ch Marak-ni PIL ka·aniko Sombar salo, Meghalaya High Court-ni Chief Justice Revati Mohite Dere aro Justice W Diengdoh-ni Division Bench knatimani ja·man, GHADC-ni term-ko sorkari ra·dodapate, Delimitation Committee-ko songahani gimin, election-ko ta·rake ong·atani katta dongja ine PIL-ko ra·galaha.

Ia hearing-ko dakanio Advocate General ND Chullai, 2026 bilsini August 2 tariko District Council Affairs-ni Joint Secretary Rapborlang Kharbihkhiew-ni Affidavit ka·gipako High Court-na on·aha aro so·sojengjeng ong·ahani gimin sorkari, 2026 bilsini March 11 tariko, gital u·iataniko on·taikuja dipet, GHADC-ni election-ko ra·doataha ine affidavit-o talataha. Ua somoio GHADC election-ko ong·atna gita, obostarang namkujani gimin a·dokni Governor-ba, 2026 bilsini March 18 tariko, Assam and Meghalaya Autonomous Districts (Constitution of District Councils) Rules, 1951-ni niamrango pangchake, GHADC-ni member-rangko 2026 bilsini April 19 tarikoni 2026 bilsini October 18 tarikona jadokna ra·doataha ine affidavit-o janapaha.

GHADC-ni ning·o manderangni jelbra jelsrusaaniko nipiltaie, gital Census-o pangchake GHADC-ni constituency-rangna simako name salpiltaina aro manderangko sualna gita, 2026 bilsini April 6 tariko GHADC, dingtangmancha Committee-ko songaha ineba affidavit-o janapaha.

Ua Affidavit-o janapani gitade, ua Committee-ko u·iataoni Executive Committee-chi ra·dodapani niamrang baksa ua Committee, jadokni gisepon GHADC Executive Committee-ni Secretary-na report-ko on·na nanggen.

Uni gimin GHADC election-ko ong·atna gita PIL ka·aniko ra·chakna man·kujawa ine Meghalaya High Court parakataha.

Indake ong·genchimoba, election-ko somoini kri ong·atjagenchimode, PIL ka·gipa mande, gital dake mokordoma ka·taina man·gen, ine Meghalaya High Court parakataha.