Tura, Sep 29, 2026: Garo Hills-o ba A·chik a·songo ge·sa mingsinggipa, nina nitogipa aro rona an·senggipa, biap Daribok Tourist Resort aro Nokrek National Park-o gong kror 32 tangkarangchi rikgimin nokrang aro tarigimin biaprang jekai Visitor’s Centre with Cafeteria, Nok A·chik, Food Kiosk with Viewing Gallery, Trekking Route with Resting Sheds aro Camping Site & Cottages-rangko nirok simsakgija galchipe donani a·sel, nokni berarangko tarigipa bolrang nosto ong·tokaha.

Ua nokrangko taria matchotsrangkujaon, nokdonggae ba oprake on·ahachim, indiba da·alona bilsigni ba bilsigittam mangna galchipe donengkua. Ua nokrangko taria matchotsrangkuja, tarina nanganirang bang·en dongkuenga, nokrango bijoli-rangko wiring ka·kuja, chi pipe-rangko salkuja. Ua nokrangko nirok simsakna gita songni manderangnaba pakwattaija, sorkariba name nirok samsaktaiskaja. Indin sochipate donenga.

Nok A·chik jekon gong lak 12 tangkarangchi rikahachim, balwana be·gropaha aro uko rikpiltaigija galchipe donenga. Unbaksana Food Kiosk with Viewing Gallery-de nokkingo angipa tiles-rang namjani a·sel mikka selengjok aro beam be·sriaha. Trekking Route & Resting Sheds-ba simsakgija galchipani a·sel matchurangsa ki·e donskaengjok. Ua biapara dingtangmancha Nokrek National Park ba Nokrek A·bri-chi doanggipa manderang neng·takchina tariachim, indiba nirokjani a·sel matchu pattan pilskajok.

Indake Garo Hills-ni ge·sa mingsinggipa Tourist Resort-ko sorkari aro contractor-ni simsakgija galchipe donanichi, Tourist manderangna namen kratcha·beani ong·a. Ua nokrangko nokdonggae on·ani ja·mano matchote tarienba, songni manderangko kam ka·na rakkigenchimode, songni manderangna mingsa janggi tangani chol ong·genchim. Indiba sorkarian galchipe donengani a·sel, gong kror 32 tangkarangchi rikgimin nokrang indin sochipe dongna nangenga.

Uni gimin, a·dok sorkari aro contractor, ua nokrangko taripile on·genchimode, A·chik a·songna namen katchabeani aro kusini ong·genchim. A·bachengo bang·a manderang Daribok Tourist Resort-ko nina re·angrongachim. Indiba da·ode re·anga komijok, maina ramarangba namjajok.