Shillong, Sep 25, 2026:: September 28 tarikoni 30 tarikona, India a·song gimikon bank-rangko chiptokengani gimin manderang an·tangtangni nangchongmota kamrangko ka·na gita, September-ni 27 tarik Robibar salo, pilak bank-rangkon kulichina Finance Ministry-ni u·iataniko Confederation of Meghalaya Social Organisations (CoMSO) jegalataha.

Robibar salo bank-rangko kulichina ge·etaniko jegalatenba, Meghalaya a·dokara Kristianrang bang·batgipa a·doksa ong·a aro ua salo Kristianrang, olakkiani somoi ong·ani gimin, Robibar salo bank-rangko kuliataniara kraani ong·ja ine CoMSO-ni General Secretary Balkarin Ch Marak parakataha.

Kamrangko ka·toanide, Meghalaya a•dokni toromo bebe ra·ani aro songsalo manderangni janggi tangani bewalko dingtangatna man·ja. A·dokni nangnikanirangko nichenggija bank-rangko kulichina ge·etaniara kraani ong·ja ine Marak parakataha.

Manderangna bank-ni kamrangko ka·na chol on·aniko jegalenga ong·ja, indiba bank-rangni strike ka·na skang ba ka·ani ja·man kam ka·ani somoiko bakrodapatskana, ATM-rangko nambatatna aro dingtang dingtang kamrangna digital service-rangko namdapatskana cholrangko sandina nanga ine CoMSO didiataha.

Robibar salo bank-rangko kuliatani pal dingtang cholrangko sandiskachina gitaba CoMSO, Finance Ministry, Reserve Bank of India, dingtang dingtang bank-rang aro Meghalaya sorkariko didiataha.Manderangni nangnikanirangko knachakja ong·ode, nangani kri ja·kurangko de·na draatako man·naba donga ine CoMSO mikrakataniko on·ataha.