Phulbari, Sep 20, 2026: West Garo Hills a·jani Chibinang antiko chipatani adita sal ja·man, Monggolbar salon anti cha·piltaiani gimin, September 19 tarik Sonibar salo Chandigre kal·chakram biapo jinma tom·e chanchirimaniko dakenba jegalangtokaha.

Ua tom·anio jolni bol 20-na baten Nokma-Sanirang aro dingtang dingtang NGO-rang jedake ACHIK, GSMC, NGCO, ANYO, ADIL, GES, DINDAM aro jolni manderang bak ra·angtokaha.

Indake tom·anio Nokma-Sanirang, NGO-rang aro jolni manderang apsan chanchirimenba, Monggolbar salo Chibinang antiko rorirangni cha·aniko dontongatsrange Bikkonggre anti gitalko cha·skana tik ka·angtokaha.

Unbaksana, District Council-ni a·arango rorirangni dokkan dakaniko aro rorirangna dokkan bara on·aniko dontongate, A·chikskarangna on·skachina, District Council-na lekka sedoate, didianiko dakna jinma namnike tik ka·angtokaha. Uni gisepon, District Council-ni a·arango nok rike aro para on·e cha·enggipa gimikon chipna ba dontongna nanggen ine Nokma-Sanirang, jolni manderang aro dingtang dingtang NGO-rang tik ka·angaha.

Indake, tom·a matchotani ja·man, Chandigre kal·chakramoni Chibinang antiona jinma re·jomaniko dake, Chibinang antiko cha·pilaniko dontongchina chrik a·boke, namnikgijaniko mesokangaha aro ua re·jomani tom·tome matchotangaha.