Tura, Sep 18, 2026: NEHU Tura Campus-o poraienggipa, Post Graduate Students Union (PGSU)-ni President Joyshelman D.Sangma-ni dilanichi ge·gni dingtang dingtang memorandum-rangko Education Minister Lhakmen Rymbui-na on·angaha.

Skanggipa, PGSU-ni a·dok sorkariko didiataniara, East Garo Hills a·jani Williamnagar, Dawagre-o rikgija galchipe donenggipa Horticulture College-ko ta·rake rikchina mol·molani ong·achim. Ia Horticulture College-ko 2008 bilsio rikna gita biapko tik ka·aha aro 25.50 hectare a·arangko Dawagre-ni A·king Nokma poraienggipa chatro chatrirangni namgnina miksonge, 2009 bilsio indin on·aha. Indiba bilsi 15 batangpiloba, da·onan ia Horticulture College-ko rike on·kuja. Gnigipa 2019 bilsio approval on·gimin, NEHU-ni Syllabus-ko da·onaba a·bachengate on·kuja.

Unbaksana, NEHU-oni State University-ona affiliate ka·aniko ru·uatjachina, ta·rake institute-ko kulienba, pangkamgipa skie ra·aniko on·china, chatro chatrirangko a·mikbrang ong·atjana aro joltangni agricultural research-rangko dakchakna aro regional economy-ko tang·doatchina gitaba, Union dabiangaha.

Gnigipa memorandum-o, Tura Govt College-o academic administrative aro infrastructure-rangko rikdape on·china dabiani ong·a. Maina morning shift-o skigiparang chu·ongjani gimin class-rangko salanti ra·na man·jani a·sel poraienggipa chatro chatrirangna nangchakeani ong·enga. Pangkamgipa faculty aro infrastructure chu·ongjaengani gimin, NEP 2020-ni ning·o FYUP-na dakchakaniko on·china, PGSU didiangaha.

Unbaksana NEHU-ni Vice Chancellor incharge-ko gronge, memorandum-ko on·angenba, gong kror 35-ni infrastructure project-ko ru·utatani bidingo talataniko on·angaha. Ia project-na Pradhan Mantri Jan Vikas Karyakram (PMJVK)-ni ning·o Ministry of Minority Affairs, 2025-2026 bilsina, re·anggipa 2025 bilsini June 30 tariko student hostel, academic buildings aro campus-ni facility-rangna tangka paisarangko on·ataha.

NEHU Tura Campus-o facility-rang chu·ongjani a·sel, chatro chatrirang neng·nikanirangko chagrongna nangengani gimin, ta·rake University Administration-ko a·bachengatchina, tender-rangko a·bachengate, work order-rangko on·china, rika cho·anirangko nama bewalo somoi gita a·bachengatchina aro fund-ko nangani kri jakkalchina PGSU Vice Chancellor-ko didiangaha.