Dadenggre, Sep 17, 2026: West Garo Hills a·jani ning·o donggipa Dadenggre songo 13 Brothers Committee-ko done, skanggipa changna Dadenggre Football League 2026-ko ong·atanggipa mijal September 16 tariko bon·kamgipa kal·anio ba final-o 15-United chegipa ong·aha.

Dadenggre Football League 2026-o gimik dol 8 bako ra·angaha aro ua dol 8 kal·giparangoni nambatgipa dolrangara, Hope United aro 15 United final-ona soke, dolgnian bilsue kal·genchimoba, 15 United goal 4-ko chipna man·aha, indiba Hope United goal 2-kosan chipna man·e, 15 United chegipa ong·aha.

Ia Dadenggre Football League 2026-o kal·anggiparangna dingtang dingtang boksisrangko on·angaha, jedake kal·a gimiko bang·bate goalrangko chipgipa Iron Wolves FC-ni Bikko M Marak, gimik goal 5-ko chipe Top Scorer-ni boksisko man·angaha. Kal·anirango nambatgipa, 15 United-ni Denish M Sangma boksisko man·angskaha aro 15 United-ni goalkeeper Silsram M.Marak, nambatgipa goal keeper-ni boksisko man·angaha.

Dadenggre Football League-ko ong·atna gita kal·giparang an·tangtangan gisiko nange on·gilaniangko dake, skanggipa changna nambee ong·atna gita man·aha aro name matchotatna man·anina, kal·giparangni on·gilegiparangko, Dadenggre-ni MLA Rupa M. Marak-ko, gitcham MDC Levastone T. Sangma-ko aro gipin on·gilpagiparangko, dingtang dingtang kamrangchi dakchake on·gipa sakantikon, 13 Brothers Committee-ni President Sengman A. Sangma mittelpilangenba, mikkangchi nambate ong·atangkuna gitaba ku·monganiko on·angaha.

Indake, Dadenggre Football League 2026-ni bon·kamgipa salo ba final-ona Jengga Jileng M. Marak mongsonggipa sokgipa ong·e bako ra·angaha aro unbaksana Ajigre-ni Nokma Greneth A. Sangma, Dadenggre Youth Club-ni Secretary Amsrang M. Marak aro gipinrangba dongpae bak ra·angaha.