Tura, Sep 16, 2026::​West Garo Hills a·jani Dalu C&RD Block-ni ning·o donggipa Dalu Chaipani-o rikenggipa dollongara gong kror 12-ni project ong·achim. Ia dollongara ge·sa Dalu jolo songdongenggipa manderangni salantio bajar cha·na, dokkan dakna, Office re·na, dingtang dingtang nanga kamrangna aro skul re·rurana nangchongmotgipa ong·a. Ia dollongko rika matchotna am·engahachim. Indiba ia dollongko rikanio chu·onga gita namgipa bosturangko ba raw material-rangko jakkalgija rikaha ine Garo Hills-ni Social Activist saksa S.Salgra Momin parakataha.

Salgra Momin-ni parakatani gitade, ia
​Project-ko MP Agarwal Private Limited-ni Manager Semol Gosh minggipa pilak kamrangko nirokachom aro Semol Gosh, Dalu songonin ong·achim, unbaksana Partip Hazarika Side Engineer ong·achim.

Iani bidingo ​re·angipa September 11 tariko, biapona re·ange nion, dollongni kokkimao be·gruaha, ua be·gimin dollongni kokkimao silchi sing·chake donenga aro uasan ong·aigija, welding ka·gipa rod-rang aro silrang be·tongaha. Uni a·sel, dollongni jrimako ra·chakna amjae, dollong kokkimao bretaha ine Social Activist parakataha.

Ian MP Agarwal Private Limited Company-ni namedake silrang aro rod-rangko welding ka·jani a·sel ong·aha aro kamrangko mature ong·atgija ka·ani a·sel be·tongaha, ine Momin matnangataha.

Ia dollongko rikanio a·mang bringipa an·chengko jakkalani a·sel cement aro ro·ong brine tarigipa dollong baijaha. Indita damni dollongko man·baani maming namgni dongjaha.
Uano kam ka·gipa manderangko sing·on, “ia dollongko ja·achi re·gipa bakode cement baksa rakninggipa samko jakkalaha, indiba gari re·gipa bakode rakninggipa samko jakkaljaha” ine aganaha.

Ia dollongko rikna gita a·dokni Skotong Minister Conrad Sangma-ni ka·sae on·atgipa project ong·achim. Contractor-rang baikamgipa dollongko rikgija, tangka man·na mangmang dikdiksana baigipa bosturangko jakkale rikani a·sel, ru·utgijan Chaipani dollong nosto ong·aha. Iandake contractor-rangni name kam ka·jani a·selan, bilsi 40 ba 50 bainagipa dolongrang bilsi 2 gapgijan nosto ong·aha. larang pilakan kam nirokgipa Company-ni Manager aro Engineer-ni a·sel ong·aha ineba Momin matnangaha.

Uni gimin indake kam ka·gipa Company-na mikkangchi contract on·na nangja aro a·dokni gam-jinko rusigipa manderangko a·rikgalna nanga ine Social Activist didiataha.

Iandakgipa company ba contractor-rang, Garo Hills-ni dal·dalgipa project-rangko jako ra·e ka·engon, chu·onga gita namgipa chemical-rangko aro bosturangko jakkale, Dalu Chaipany dollongko taripiltaichina, a·dokni Skotong Minister, joltangni MLA aro Department-ni Officer-rang, ge·etaniko on·piltaichina mol·molatenba, cha·bokgipa company aro Contractor-ni kosako sandianiko dakchina aro niam gita raka ja·kurangko de·china Momin didiataha.