Baghmara Sep 2, 2016: South Garo Hills a·jaona dakanggipa National Highway-62 (NH-62), jekon da·o NH-217 mingskahachim, ia ramarang namsrangjahani gimin, ia ramako ta·rake tarichina dabie, South Garo Hills a·jani nangrimgimin dingtang dingtang NGO-rang da·al September 2 tarik Budbar pringoni a·bachenge salgnina Non-Cooperation Movement (NCM)-ko ong·atenga.

Batanggipa salrangonin South Garo Hills-ni NGO-rang ia ramako tarie on·china changni chang sorkarina lekkarangko sedoatahachim, indiba da·alona kingkingba ia ramako tarie on·na gisiko nangjawngani gimin, da·alo NCM-ko ong·atna tik ka·aha, ine NGO-rang u·iataha.

Ia NCM-ko South Garo Hills a·jani Garo Students’ Union (GSU) Southern Zone, Federation of Khasi Jaintia and Garo People (FKJGP), ADE, AYWO, AHAM, NGCO, APA aro gipin dingtang dingtang dolrang baksa nangrime ong·atenga. Ia NCM-ko ong·atengon, South Garo Hills a·jani dingtang dingtang biaprango songdongenggipa manderangba apsan ku·monge bakrimpaaniko on·paenga, ineba u·iataha.

NCM-ko Budbar pring 5 bajionin Baghmara aro dingtang dingtang biaprango donggipa dokkanrang, skulrang, sorkari office-rang, bank-rang aro dingtang dingtang bading chiwalchakram biaprangko chipe dontokaha

South Garo Hills a·jani bang·bata biaprangon gari gorarangni re·ruraanirangko nikna man·jaha, indiba ambulance ba sagiparangko salgipa garirang aro uandake nangchongmota kamrangna re·ruraenggipa garirangkode re·na gita on·aia.

Ia NH-62 rama, jekon da·o NH-217 ine mingskahachim, rama namsrangjahani a·sel salanti re·ruraenggipa manderang, Skul re·gipa chatro chatrirang aro bading chiwale cha·giparang namen neng·nikanirangko man·tokengani gimin ia ramako ta·raken tarichina dabie, South Garo Hills a·jani nangrimgimin NGO-rangrang, salgnina NCM-ko ong·atenga.