Tura, Oct 18, 2026::
Meghalaya a·doko Aadhaar-ko Mandatory ba mongsonggipa dake ra·gatani kosako jegale sak 150-na baten songni ba gittimni manderang bak ra·e, Public Community Picnic aro Strategy Session-ko October 17 tarik Sonibar salo pringni 10 bajioni attam 2 bajiona Tura-ni Ballonggre-o tom·e chanchirimaniko dakangaha.

Ia tom·aniko Meghalaya, ‘Citizens’ Forum for Constitutional Rights’ (CFCR)-ni dilanichi, Constitution-ni Niamrang, Privacy aro Aadhaar-ni gimin Legal Safeguard-rangko manderangna talataniko dakangaha. Bang·a manderang tom·anio bak ra·pana sikgenchimoba, nokdango gipin kamrang donganichi re·bana man·jaha.

Tom·aniko J.N.Sangma rimchaksokani kattarangchi a·bachengataha, uni ja·mano Greneth M. Sangma (Petitioner, High Court of Meghalaya) Aadhaar-ko ra·gatanio niamni gita neng·nikanirangko man·engani gimin aganangaha. Uandake S.Ch.Sangma, Justice K.S. Puttaswamy (Retd) V. Union of India-ni ka·gimin Supreme Court-ni raio ka·sae Right to Privacy-ni gimin talate on·angskaha.

Tom·anio bak ra·gipa manderang, Aadhaar dongjani gimin lekka-porani, seng·ani, sorkarini dakchakani aro essential service-rangko man·jae, neng·nikanirangko chagrongna nangengani giminba chanchiangaha. Uandake manderang sorkarini niamrangko aro Adalat-ni order-rangko ba ge·etaniko manina dabiangaha.

Indake tom·bagipa manderang pilakan Resolution mingbriko ra·angaha, ua Resolution-rangara:

Skanggipa Resolution, Unlawful Mandatory Aadhaar-ko jegalani,
tom·bagipa manderang Niam aro Adalat-ni raiko pe·e Aadhaar-ko mandatory dakaniko ku·cholsan jegalangaha. Constitution-ni niamrangko aro niamo on·gimin alternative identification mechanism-rangko jakkalna man·atchina dabiangaha. Man·na kragipa manderangna essential services aro legitimate entitlements-rangko champengangjachina gita ku·mongaha.

Gnigipa Resolution, Concern Authority-rangna Legal Notice-ko on·ani gimin,
tom·bagipa manderang, Niam aro Adalat-ni Order-rangko pe·e, Aadhaar-ko Mandatory dakgipa Order ba Notification-rangko ge·etanina, Concerned Deputy Commissioner, Chief Secretary aro Commissioner/Secretary-rangna Legal Notice on·na gita chanchiaha. Sorkariko gitcham order-rangko review ka·e ba nipiltaie, namatchina ba pe·galchina dabiangaha.

Gittamgipa Resolution, re·baenghipa November jao Tura-o Peaceful Rally-ko dakani gimin, manderang, Aadhaar-ko niam gita ra·gatchina, alternative Identification Mechanism-ko on·china aro essential services-rangko champengjachina dabie, November jao Tura-o Peaceful Rally-ko ka·na chanchiangaha. Tarik aro biapko ja·mano parakatna gita tik ka·e donangaha..

Brigipa Resolution, Court Order-rangko maniani aro Contempt Proceedings-ko dakani, High Court of Meghalaya aro Supreme Court of India-ni Order-rangko ge·eta gita uano pangchake manichina tom·bagipa manderang dabiangaha. Legal examination-na official record-rang aro evidence-rangko chimongna gitaba chanchiangaha aro ge·etgimin, Court order-ko wilful/withful disobedience dakani donggenode, competent Court-o Contempt-of-Court Proceedings-ko dakanggen.

Tom·anio dongpagipa manderang, sorkari authority-rang niamko pe·genode, corrective action-ko ra·china aro niam gita accountability-ko dongatchina gitaba didiangaha.

Indake Citizens’ Forum for Constitutional Rights-ni dilgiparang, Meghalaya Sorkariko, Deputy Commissioner, educational institutions, healthcare establishments aro gipin authority-rangko Aadhaar-related procedures-rangko review ka·e Constitutional Rights, Individual Privacy aro Court-ni Direction-rangko mande ra·china mol·molangaha.

Organiser-rangni talatani gitade, ia kamara sorkarini namgipa scheme ba program-rangko champengnade ong·ja, indiba niam gita chu·sokatna dabianisa ong·a. Ma·mongo bak ra·giparang aro dakchakgiparangna mittelpilaniko on·atengon, songadamni manderangko peaceful aro democratic-ni bewalo re·jomanichi an·tangtangni dabianirangko cha·sokatchina mol·molangjolha.

Tom·anio resolution mingbriko ku·cholsan ra·anganichi, Legal Notice on·ani, November jao rally ka·ani aro court-ni remedies-rangko ra·na gita miksonganichi tom·aniko matchotataha.