Tura, July 17, 2026:: South Garo Hills a·jani Zikzak Block-ni ning·o donggipa Pagalpara songo, Garo Hills Autonomous District Council (GHADC)-ni Civil Works Department, tol·e kam ka·aha ine Niksamso Garo Community Organisation (NGCO) parakataha.

NGCO-ni parakatani gitade, ZIkzak Block-ni ning·o donggipa Pagalpara songo Civil Works department-ni gita kam ka·na list on·gimin gitade, RCC dollongko riknasa on·achim, indiba RCC dollongko rikgija, Submersible-kosa riksikaha. Ia Submersible-ko rikanio mangrakna ba baina gita maming rod-rangko on·gija ro·ong mamgmangchi rikani a·selsa be·gruaha, ine parakataha.

Ia submersible-ko rika matchotani jasa ba jagnini gisepon be·gruaha ine songni manderang NGCO-na report-ko on·ataha. Ia submersible-ko rikna gong lak 70 tangkarangko chamataha, indiba togie kam ka·ani a·sel, songni manderang re·a doanio neng·nikaniko man·enga, ine parakatenba, indake cha·bokani a·sel, A·chik a·songni kona noksikrangon maming namroro silroroaniko nikna man·jaenga ine NGCO, GHADC, Civil Works department-ko matnangataha.