Tura, July 10, 2026:Garo Hills-o skanggipa changna, Mission Mausam-ni ning·o West Garo Hills a·jani Rongram C&RD Block-o ga·akgipa Albella Chidekgre songo Doppler Weather Radar (DWR)-ko songe on·na July 8 tariko jinma re·ange nietokaha.

DWR-ko songna gita bon·kame biapko niangani salo New Delhi-ni India Meteorological Department (IMD), Shillong-ni Meteorological Centre, Tura-ni District Disaster Management Officer (DDMO), Rongram C&RD Block-ni BDO aro Chennai-ni Pattern India Limited baksa songni Nokma aro Albella Chidekgre-o songdonggipa manderangba dongpaaha.

Ian IMD Headquarter-ni ja·ku de·dilani ong·a jekon, Meghalaya State Disaster Management Authority (MSDMA) aro District Disaster Management Authority (DDMA) baksa bakrime kam ka·na gita dingtangmancha biapko bon·kame niani ong·a aro ru·utgijan Doppler Weather Radar-ko songe on·gen ine parakangaha

Ian Garo Hills-o sin·a aro ding·ani, mikka balwa rakanirangko u·isona dakchakani ong·gen. Jechin maiba a·sel ong·na skangan manderangna mikkrakatsona ba tarisamsona cholko on·gen, ineba parakataha.