Williamnagar, July 9, 2026: Niksamso Garo Community Organization (NGCO) HQ, re·anggipa 2021 aro 2022 bilsio GHADC-ni Tied aro Untied Scheme-ni ning’o Civil Work Department-na on·atgipa kamko ka·jahani gimin NGCO suk ong’gijaniko parakataha.

Iani bidingo NGCO re·anggipa 2023 bilsio, chu·sokatgijagipa kamrangko chu·sokate on·china, MDC-rang aro bil gnanggipa official-rangko mol·molenba,, bilsi 2 ba 3 rangna galchipe donenggipa kamrangko somoi gita matchotatchina contractor-rangko didiataha.

Indiba, uamang da∙onaba bang∙a jolrangon development-ni kamrangko ka·gija, galchipe donengkua. Fifteenth Finance Commission (FFC)-ni on·atgipa Fund-rangko ba tangka paisarangko ong·gija kamna jakkalsrete, sera bera ong·atani a·sel manderangni development-ko nosto ka·aha ine NGCO matnangataha.

Kam ka·kugijagiparangko ka·china bilsi gittam somoikk on·ani ja∙mano, ia Scheme-ni kamrangko ka·jahani gimin, NGCO GHADC-ni Civil Work Department-ni development-rangko am·sandiaha. “Chingni field inspection-rango nikani gitade, bang∙a songrangon development-na tangkarangko on·manaha, indiba development-rang dongja aro RTI report-o songni bimingrangko on·gija tangkakode okmanjok. Ia Scheme-oniko lakni lak tangkarangko cha·manaha iarangko chinga 2023 bilsioba sing·sandiaha, indiba chingna kakketko parakna man·jaha. Uamangni tangka paisarangko jakkalgiparang gong kror 9 mangna bataha” ine NGCO-ni President Tengrak Marak parakataha. .

Bang·bata development Scheme-oniko kam ka·gija galchipgiparangara, South Garo Hills, West Garo Hills, North Garo Hills ong·a, uarangko am·sandie niani, bang·a songadam nokadamrangon kamrangko chu·soke ka·a dongja ine nikna man·aha.

Indake, ma·mong sorkarini GHADC-na on·atgipa gong krorni kror tangka paisarangko rusie galaha aro songni manderangna dakchakaniko on·china chamatgipa tangka paisarangko indin jakatsrete bon·ataha ine Marak parakataha.

Ma·mong sorkanini on·atgipa Scheme aro tangka paisarangko nosto ka·asan ong·ja, indiba jatni dal·begipa niam rongdikko rakkigipa GHADC-kon gimaatna kamko ka·enga. Iani bidingo am·sandianiko dakon, kamrangko ka·aha ine tol·e parakaha, indiba biapona re·ange niode, kakket ong·gipa dongja, iarangni chong·mot sakkirangko man·gen. Uni gimin, A·chik jat sakantinan parakatenga aro uamangni kosako kakket bichalko ra·bana am·sandianiko dakchina NGCO ma·mong sorkariko didiataha.