Gasuapara, July 2, 2026: GHADC election-ko ja 6-na ra·doatani ja·man gital, Executive Committee (EC)-ko rikenggipa MDC-rang, an·tangtangni ku·rachakgimin kamrangko chu·sokatgija katna chanchiengama, ine 4-Rongrikkimgre constituency-o Indipendent candidate ong·e susaenggipa Clinton R.Marak sing·doataha.

Re·anggipa, April 18 tarikon MDC-rangni term bon·ahachim. Indiba rorirangni MDC election-o susana am·ani gimin, kajia golmal ong·e, election-ko dikdiksana dondikataha. Uni ja·mano gital EC- ko riktaie, MDC-rang Sheduled Tribe (ST) Certificate-ko mandatory dakaha. Uni gisepon, uamang Garo Customary Law (GCL) aro Separate Electoral Roll (SER)-ko ja 6-ni gisepon, pass ka·e ba ra·gate on·na ku·rachakaha.

Indiba da·alo uamangni kamrangko nikrikani gitade, GSL aro SER-ko dongale, delimitation aro service rule-rangni giminsa kam ka·aniko nikna ba knana gita man·enga. Beben uarangko nangja, inede ong·ja, indiba uamang jeko ku·rachaka uko somoi gita chu·sokatna nangchongmota. Uko chu·sokatna man·jaode, A·chik jatni nisengsoenggipa GCL aro SER-de, indin ong·gramani ong·aignok aro indake ong·bebeode, an·tangtangni MDC seatna kene, ja 6-na somoiko ra·dodapani ong·enga. Maina Sixth Schedule-ni paragraph-2-ni (6-A)-o parakani gitade, “Maibakai a·songo emergency ong·anichi election-ko dontonggenchimoba, golmalrang nampilahaode, ta·raken Election-ko ong·atna nanga ine talatanirang gnang” ine Marak parakataha.

Indiba da·alo bang·batan, Sixth Schedule-ni paragraph 2 (6-A)-ko Governor-ni namnikanio pangchake ja 6 ba bilsi 1-na election-ko ra·dona man·a inesa u·ia aro chu·gimik niamko talatgija, an·tangtangni man·gnina niam gita kamko ka·jaenga.
Indide da·alo, maming kajia golmalrang dongjahaoba, maini gimin election-ko ja 6-ni ja·mansa ong·atna gita am·enga ine Marak sing·doataha.