Tura, June 26, 2026:Directorate of Enforcement (ED), Sub-Zonal Office Shillong-oni am·sandianiko dakanio Garo Hills Autonomous District Council (GHADC)-na chamatgipa tangka paisarangko jakkalsretaha ine matnangako man·gipa Asananggre-ni gitcham MDC, Ismail R. Marak-ko rim·a man·aha.

Prevention of Corruption Act, in Tura-ni ning·o, Special Judge-na badi ka·doanio pangchake, ED ua mamlani bidingo am·sandianiko dakenba, Meghalaya Lokayukta-o segataha. Provisions of the Prevention of Money Laundering Act, 2002-ni ning·o Marak-ni lak 40 mangni gam-jinrangko ED ra·sekaha.

Garo Hills Autonomous District Council (GHADC), “Grant for Excluded Areas”-ni ning·o komibeoba kror 28.66 tangka paisarangko man·soaha, jeonikon gong kror 1 tangkarangko 16-Asananggre Constituency-ni ge 49 Project-rangna suale on·aha ine ED parakataha.

Meghalaya Financial Rules, 1981-ni dongimin niamko pe·enba, project-ni kamrangna 60 percent tangka paisarangko work order-rango pangchake kamko a·bachengatjaan gimin, contractor sakgni Kubon Sangma aro Nikseng Sangma-na wataha, jeon uamang tol·e soi ka·draaha. Indake ua tangkarangko ong·gija kamna jakkalsretaha ine ED parakataha.

Directorate of Enforcement-rangni am·sandianio chu·gimik tangka gong lak 52.60-ko u·ina man·aha. Uanoni gong lak 9.60 tangkarangko Ismail R. Marak jaktangchi okaha aro lak 33 tangkarangko uni jikgipa Pratibha Marak-ni bank account-ona sakgipin contractor-ni account-oni watatako rim·a man·aha.

Batanggimin 2025 bilsini December 4 tariko PMLA-ni ning·o gong lak 16.38 tangka donggipa bank account-rangko agency-rang dontongataha ba chipataha. Adjudicating Authority-rang ua apsan mamlako sandienba, ja·mano ma·siaha aro iani bidingo am·sandianiko dakangenga ine ED parakataha.