Tura,, April 26, 2026: All Meghalaya Muster Roll Progressive Workers’ Union (AMMRPWU) Garo Hills Zone (GHZ), Head Quater, Shillong, April 25 tariko chang 4-gipa General Meeting-ko North Garo Hills a·jani Resubelpara Mini Stadium-o ong·atangaha.

Ia tom·bimonganio Garo Hills-ni dingtang dingtang sorkari department-rango Muster Roll (MR), ka·enggipa manderang baksa Khasi aro Jaintia Hills a·jani Muster Roll-rang sak 300 baten re·bae bakko ra·angtokaha.

Indake ia tom·bimonganio AMMRPWU Central Body-ni General Secretary Bah Nazarus K.Lanong, Jaintia Hills Muster Roll Workers’ Labour Union (JHMRWLU)-ni dilgiparang aro Joint Action Committee Muster Roll Workers’ Union (JACMRWU)-ni Chairperson Kong Dayoo Iakai aro JACMRWU-ni Adviser, Bah Khrooh L.Pariat mongsonggipa sokgipa ong·e bakko ra·angaha.

Ia tom·bimonganio mongsonggipa chanchirimani ja·pangara, Meghalaya a·dokni dingtang dingtang sorkari department-rango kamko ka·enggipa, Muster Roll (MR)-rangni man·gnirangko sorkari name aro tik ong·e on·jaengani gimin, MR-rangni man·gnirangko kraa bewalo on·china dabie, dolgni Union-rangni bakrime bikotgipa JACMRWU, re·anggipa 2025 bilsini November 27 tariko a·dokni Skotong Minister Conrad K.Sangma-na memorandum-ko on·ahachim.

Indake ong·genchimoba, a·dok sorkari Union-ni dabianiko knachakjaengani gimin re·anggipa, April 9 tariko Tura aro Shillong-o jingengataniko dakna gita tik ka·aha. Uni gisepon, a·dokni Skotong Minister Conrad K.Sangma, rang·gitik Union-ni dilgiparangko okamte, April 9 tariko chanchirimaniko dakaha aro Union-ni dabianirangko nipiltaie, ra·gatna nanggiparangko ra·gate on·na, department ge·antini officer-rangna ge·etaniko on·gen, ine ku·rachakahani gimin, Union April 9 tariko jingjengatna tik ka·giminko dontongataha. Indiba Skotong Minister-ni ku·chakgiminko April jao chu·sokate on·ja ong·ode, Meghalaya a·dokni dingtang dingtang district-rang aro block-rango dal·begipa jingjengataniko a·bachengatna tom·anio jinma tik ka·angaha.

Union-ni dabianirangara re·anggipa 2025 bilsini April 1 tarikoni 2026-ona MR-rangni man·gni VDA-ko bariate on·china, MR-rangna order on·gipa retirement bilsi 58-ko ra·galpile, 2009 bilsio Governor-ni order on·gimin bilsi 65-kon ja·rikangkuchina, department dingtang dingtango MR ka·giparangko Semi Skilled, Skilled aro Highly Skilled-o bilsianti upgrade ka·e ba ra·doe on·china, bilsi 10 gapgipa MR-rangko ta·raken Regular Casual Worker (RCW)-o biming segatchina, MR-rangni dormaharangko department ge·antion somoi gita jani skanggipa antion on·china, RCW gapgimin MR-rangna Highly Skilled-ni hajirako on·china, MR-rangna EPF-ko ra·gatchina, me·chik MR-rangna Maternity Leave aro me·asa MR-rangna bilsio sal 15 casual leave-ko on·china, Union-ni mongsonggipa dabianirang ong·a.

Iani bidingo a·dokni Skotong Minister an·tangan, April 9 tariko Union-ni dilgiparangko okamate, an·tangni office chamber, Shillong Secretariat-o agangrikani somoio ia dabianirangko nipiltaigen aro ra·gatna nanggipa niamrangko ra·gatna, department ge·antini officer-rangna ge·etaniko on·gen ine ku·rachakatahachim. Indiba, April ja bon·angpiloba, department-ni officer-rangna maming ge·etanirangko on·kujaengani gimin, re·baenggipa May jani skanggipa antion Meghalaya a·dok gimiko jingjengataniko a·bachengattaina Union tik ka·angaha.