Ampati, April 12, 2026: Garobadha-ni Pulis Investigation Centre (PIC)-ko Pulis Out Post-ona tang·onataniko, A’chik State Peoples’ Front (ASPF) raken jegalataha aro ua PIC-ko skang gitan apsan donpilchina aro ua ge·etaniko ra·galpilchina dabie, chubata gadango kam ka·giparangko mol·molataha.

South West Garo Hills a·jani Superintendent of Pulis (SP)-na seatgipa chittio janapatani gitade, iani bidingo ja·ku de·aniko re·anggipa April 8 tariko songbad-rango parakataha. Iako ja·ku de·anina manderang suk ong·gijaniko parakataha aro niam reti-o ka·donganiko on·chepe ra·ani ong·enga, ine ASPF parakataha.

Minggipin, Garobadha PIC-ko Pulis Outpost-ona tang·onataha ine koborko parakatanina, manderang suk ong·gijaniko parakatskaha.

Garobadha aro uni wilwilao dongenggipa manderangni namgnina chanchie, ASPF ua biapo donggipa manderang bang·a neng·nikanirangko chagrongronga, jekai manderangni niam reti-ni gita aro chel·chakanina nangchapgipa mamlarang ong·a. Investigation Centre-ni gadangko tang·onatanichi pulisrangni kam ka·aniko bilgriatgen aro Outpost-o name kam ka·na man·jawa, neng·nikani somoio mamlarangko niroke am·sandianirangko dakna man·jawa, ine ASPF parakataha.

Manderangni nangnikani batrikrikengon, kam ka·e on·na man·na gita Investigation Centre-ko chu·gimik Pulis Station-ona tang·doatnasa nangenga ine ASPF parakatenba, PIC-ko bon·atna chanchie ja·ku de·aniko ra·pilchina didiataha. Ian pulisrangni kam ka·aniko dal·e ra·gija dake ga·akenga ineba parakataha.

Uni gimin chubata gadango kam ka·enghipa officer-rang ta·raken, PIC-ko tang·onatna ge·etaniko ra·galpilchina aro Investigation Centre-ko donpilchina aro chu·gimik Pulis Station-ko ra·doskachina, ja·kurangko de·angchina, ASPF didiangaha. Iandakgipa ja·kurangko de·na chanchianiko dakna skang jolni manderang baksa chanchianiko dakesa, manderangni agan-ku·pattianiko ra·chengchina ASPF didiataha.