Williamnagar, April 6, 2026: GHADC eleksinko ra·dona mangmangsan gital, Executive Committee (EC)-ko songama, ma ia gital EC-ko songanio uamang A·chik jatni nangnikanirangko chu·sokatna ku·chakmikesa songtaiama, ine Niksamso Garo Community Organization (NGCO) sorkario sing·doataha.

GHADC-ni eleksinko ra·doate, ST Certificate-ni gimin, chanchina aro uko pass ka·na, EC gitalko songenga ine parakaha. Indiba, GHADC eleksinko ta·raken ong·atna nanga, ine NGCO dabiangaha.

​Niam gitade, gital EC-ko songna man·ja, maina District Council-ko chalaigipa gitcham EC-rangan, uamangni kamko watkujachim. Uni gisepon, gitcham EC-rangko gale gital EC-ko songskaaniara term bon·ani ja·mano MDC-rangna cholko on·na miksongani ong·a.Ia policy-ko A·chik jat aro A·chik a·songo songdonggipa manderang pilakan ma·sia. Uni gimin, jatni nangnike dabianiko chu·sokatna nangchongmota aro eleksinko ra·dodame dongna nangja, ine NGCO didiataha.

​”Chinga iako raken jegalatenga, dikdiksani gisepon gital EC-ko songe, GHADC-ni eleksin-ko jadokna ra·dodapaniko chingna nangja. GHADC eleksin-ko ta·raken ong·atpilna nanga. Democracy-ni niamko ja·rikgija, MDC-rangni term-ko ra·donaniara niamko pe·ani ong·a. GHADC-ko MDC-rangchi chalaiangkuna man·ja, Governor-sa GHADC-ko jako ra·na nanga aro somoi gita eleksinko ta·raken ong·atna nanga. Maina MDC-rangni term ia April jani 18 tarikon bon·engaha. Je miksongania gital EC-ko songahachim, da·o kamrang matchotaha” ineba NGCO parakataha.

​GHADC eleksino tribal ong·gijagipa candidate-rang, chong·motan rorirangni bak ra·aniko champengna man·na gita, ST Certificate-ko mandatory dakna aro uko pass ka·na gitasa gital EC-ko songaha. Da·ode, ST Certificate-ko pass ka·aha aro Governor ra·chakmanaha. Uni gimin MDC-rangni term-ko ra·dodapgija, eleksinko ta·rake ong·atchina, NGCO a·dok sorkariko didiataha.