Guwahati, April 6, 2026: A·chikrangoni saksa robol kal·anio mingsingako man·gipa Gilbertson Sangma, Sukrobar salo a·gilsakko watangaha. Ua 1954 bilsio Assam a·dokni Dibrugarh-o atchiaha aro bilsi 71 gapahachim.

Ua dambemittingon, robol kal·na namen gisiko nanggipa ong·achim, unbaksa Kamala Nath, Subir Choudhury, Chandra Mohan Ganju mangba robol kal·anio mingsinggipa ong·na jumang niksoa gnangchim aro uamangni jumang gitan, obol kal·susapa a·bachengaha.

Uni jumang kakket ong·aha aro ua 1971 bilsio Assam Pulis-ni kam man·aha aro Dergaon-o pulisna skie ra·mitting somoio, uni changa sapanichi robol kal·na namgipa cholko man·aha.

Indaken, a·bachengo Isol una robol kal·anio namgipa gun aro cholko on·aha. Ua pangnan janggilchiko nipilronggija, 1972 bilsionin Assam Pulis Team-na robol kal·jringaha aro Assam Pulis Team-ni nambatgipa robol kal·gipa ong·aha.

Ua 1971-oni 1987 bilsiona bilsi 17-na kingking robol kal·anio bang·en goalrangko chipaha. Uni mongsonggipa kal·susaanirangara a·songtangna kal·suaanuan ong·a. Ua a·dokni kona noksik gimikchin re·roroe robol kal·aha. Ua Assam Team-ko Santosh Trophy-o kal·susana dilangaha aro 1975 bilsio Indian Team-naba kal·susaaha.

Ua da·alo dongjahaoba, uni mingnamgipa gun aro changa sapanina, Assam Team-ni robol kal·na changbatgipa ine uko pangna mande ra·angkugen aro bang·a manderangan uni sianina duk ong·e, kalimaniko dakangaha.