Ampati, Oct 2, 2025: Garoland State Movement Committee (GSMC), gital South West Zone, Ampati-ko songaha. GSMC South West Zone-ni gital dilgiparangkoba seokangaha.

Gital South West Garo Hills Zone-ko songanio GSMC HQ, Tura-ni Acting Chairman Balkarin Ch.Marak mongsonggipa sokgipa ong·e bakko ra·engon, unbaksa Finance Secretary Nikcheng Marak, Assistant Environment Secretary, Silbath A.Sangma-ba dongpaaha.

GSMC-ni Acting Chairman Balkarin Marak tom·anio indake aganangaha, “GSMC-ni songreani bilsi 13 ong·ani ja·mano Garoland State-na New Delhi-chi re·ange, Indiani President Ma Droupadi Murmu-ko uni dongram Rashtrapati Bhawan-o gronge, A·chik a·songni gimin mongsongbate Garo Ku·sik-ko 8-gipa Schedule-o napatchina 125 Amentmend aro mongsongbate, Garoland State-ni gimin mikkanggrik agana cholko man·aha.

Finance Secretary Nikcheng Ch. Marak, “GSMC South West Zone-ko songaniara Ampati-nasan ong·aija, indiba A·chik a·song gimikna dangdike on·na, ku·mong aro Garoland State-na ba dingtang a·dokna ku·mongrimchina” agan ku·pattie on·angskaha.

Assistant Environment Secretary Silbath A Sangma-ba, “Garoland State-ara A·chik a·songni jakgitelaniko dedrang su·drangna namgipa janggi tangani cholrangko ra·bagipa Political Movement ong·a. Uni gimin A·chik a·songni manderang jattangchin sason ka·na krengna nanga ine aganangaha.

GSMC South West Zone-ni General Secretary, “Chinga Ampati Zone-ni dilgiparang ong·e, Garoland State-na bil ama dipet bilake ja·ku de·gen” ine ku·rachakaha.

GSMC South West Garo Hills Zone-ni Co-Chairman Salgrak G. Momin, “South West Garo Hills-o GSMC-ko bilakatna chinga ja·ku de·engon A·chik a·songni Nokmarang, Lasker-rang baksa ku·monge mikkangchi dal·gipa tom·bionganio Garoland State-na Ampati jolo sokachakna kang·kare ka·a” ine tom·anio parakataha.

Gital seokako man·gipa GSMC, Ampati Zone-ni dilgiparangara Trillingbirth Ch. Sangma Chairman, Salgrak G. Momin Co-Chairman, waltin Ch Sangma General Secretary, Lorence Sangma AGS, Chesrang R Marak Publicity Secretary, Anthon R Marak Organizing Secretary, Shanbon Ch Marak Assistant Organizing Secretary, Birthing G, Momin Environment Secretary, Waychon Ch Sangma Assistant Organising Secretary, Utdom Arengh, Jimbirth Marak executive member, Sengson Ch, Marak member, Pringstone M. Marak member, Napak R Marak member, Robin marak member, Monush Marak. Member.

Agan Ku·wattimgiparangna SD. Sangma aro JG. Momin-ko seokanagaha.