Tura, March 20, 2026: Re·baenggipa Muslim-rangni Eid manianirangko ong·atna skang, a·jani dilgiparang, Senior Magistrate-rang, a·jani pulis officer-rang aro Central Armed Pulis Force-rang ba sipairang baksa tom·aniko dakenba, adita salrangna skang ong·anggimin obostarangni bidingo am·sandiani, nitimanirangko dakna kamrangko sualatani, tom·tomaniko aro naljokaniko rakkiangna March 19 tariko Tura DRDA Conference Hall-o tom·e chanchisamsoaniko dakangaha.

Uandake a·jani aro ma·mongni chel·chakgipa pulis dolrang bakrime ja·kurangko de·e, Eid-o a·sel ong·anirangko champengna kajia-golmal ong·nagipa biaprango Magistrate-rangko dongtimatani aro manderangna koborrangko on·ani aro tom·tomaniko rakkina tol·e jangbingbanggipa kobor-rangko champengatani bidingo chanchisamsoanirangko dakangaha.

Songdonggipa manderangni bakrimanichi, pil·nipil tom·tomanina chanchirimanirangko ong·ate, kajia-golmal ong·gipa biaprango da·ode obostarang namenga ine official-rang parakataha.

Una agreba, adita salrangna skang Shyamnagar-o Mondolini dilanichi agangrikanirangko dakanian namen dakchakani ong·aha, jeon jatgnini dilgiparang nama ramaona re·bana aro kajia-golmal ong·anggnirangko champengna ku·chake ra·angaha ine official-rang agandapangaha.

Da·o internet-ko watpilengahani gimin, tol·gipa kobor-rangko jangbingatanirangna mikrake dongchina aro official channel-rangnasan ka·dongaichina District Administration aro Pulisrang manderangko mikrakatanga baksana kakketgipa kobor-rangko am·sandina control-room aro thana-rangni number-rangko on·ataha. Iandakgipa obostarangko nirokangkukuenga ine aganenba, ka·dongna man·gipa aro kakket koborko sandichina authority-rang manderangko mol·molataha.

Walni somoirango curfew-ko ong·atangkuenga aro pulisrang salantian obostarangko nirokangkuenga. Kajia-golmalko a·bachengatgipa manderangko champengna aro jinmako naljoke rakkina, a·jani aro ma·mongoni sipairangko nitimatenga. Unbaksana, curfew-ni somoirang ba gipin nanggipa dakna nanggnirangko u·iatgen ine authority-rang manderangna ku·chakataha.