Shillong, March 20, 2026:: Garo Hills Autonomous District Council (GHADC) eleksino susagipa candidate-rangna Scheduled Tribe (ST) Certificate-ko nangtelgipa ong·atna, re·anggipa February 17 tariko, GHADC-ni gitcham Chief Executive Membor (CEM) Albinush R Marak-ni
ge·etaniko on·anina, Meghalaya Pradesh Congress Committee (MPCC)-ba chakpaaniko on·ataha.

GHADC eleksino susagipa candidate-rangna ST Certificate-ko nangtelgipa ong·atna ku·monganiko ra·chakangon, uko dongimin niamrango pangchake raken ja·rikskana nanggen ine MPCC-ni Working President Deborah C Marak parakataha.

“Ian nambegipa ja·ku de·ani ong·a, indiba iako dongimin niamrango pangchake ja·rikskana nanggen,” ine Marak aganaha.
Autonomous District Council (ADC)-rango Tribal-rangna on·gimin bilrangko aro Tribal-rangni bak ra·aniko chel·chakna gita iandakgipa niamrangko name ja·rikna nangchongmota, ineba MPCC-ni dilgipa aganaha.

NPP-ni ning·o ong·enggipa obostarangni bidingo janapatengon, GHADC-ni gitcham CEM Albinush R. Marak, an·tangsa kam wataha, uko party-de ra·galjaha ine Marak talataniko on·ataha.

“Marak an·tangsa CEM-ni kamko wataha, uni ja·mansa NPP, gital CEM-ko seokaha,” ine MPCC-ni Working President, kobor ra·timgiparangna aganaha.

GHADC-ni dilgiparangko dingtangatanio NPP-ni ja·ku de·ani giminde, Congress mamingkoba aganna man·jawa ine Marak parakataha.